Tanzanian ruihhlo tawlhtu lawk ber pakhat chu Zambia-a Zambian Drug Enforcement Commission (DEC)-in dap beihpui an thlaknaah an man tih an puang.
Ahmed Muharram-a hi Zambian khawpui, Lusaka-a dap beihpui thlaka marijuana leh codeine tel khuh damdawi diak tam tak nena Thawhlehnia man zingah a tel tih thuneituten an sawi.
“Mi rinhlelh man hi ram dang danga ruihhlo tawlhtu nia hriat a ni,” tiin DEC chuan a sawi a, kum 40 mi hi ruihhlo dotu pawl (agency)-in an lo enthlak reng tawh niin an sawi bawk.
Muharram-a man a nih avang hian uluk taka chhuia thawktute chungah agency chuan lawm thu a sawi bawk.
Zambian danah marijuana hi ruihhlo hlahawm tak leh kawl phal loh a ni a. A tawlh, kawl leh ruihna atana hman chu pawisa chawitir emaw, lung in tantir emaw theih a ni.
Africa khawthlang ramah hian ruihhlo hman sual leh tawlh a hluar hle a, a bikin cannabis leh heroin an ti nasa .
Beihpui thlaknaah hian DEC chuan Lilayi vengah lorry-a thuhruk cannabis kg 221.2 an man tih an sawi a. Muharram-a in dap zuiin cannabis ‘high grade’ kg 1,159.6 an hai chhuak zui a ni.
DEC chuan beihpui thlaknaah hian Zambian pakhat codeine tel Benylin box 55; Zambian pahnih, lirtheia cannabis thukrua phurtu leh Burundian pahnih, Chirundu district-ah lirtheia cannabis tawlhtu an man tih an sawi.
An mi mante hi dan angin an kawl a, court-ah an hruai dawn tih an sawi.