Prime Minister Dato Seri Anwar Ibrahim-a’n a sawm angin Indian Prime Minister Narendra Modi-a chuan Inrinni leh Pathianni khian Kuala Lumpur, Malaysia a tlawh dawn niin external affairs ministry thuchhuahin a tar lang.
Ministry thuchhuah chuan tuna Modi-a a zin tur hi Malaysia a tlawh vawi thumna tur a ni a, August, 2024-a India-Malaysia inkungkaihna tura ‘Comprehensive Strategic Partnership’ siam hnuah erawh a vawi khat zinna tur a ni thung tih tar lan a ni.
A cham chhungin Prime Minister Modi-a hian Anwar Ibrahim-a a kawm dawn a. Malaysia-a Indian awmte nen an inkawm bakah industry leh sumdawng aiawhte a kawm dawn bawk.
A cham chhung hian 10th India-Malaysia CEO Forum chu hman a ni dawn bawk tih ministry thuchhuah chuan a tar lang.
India leh Malaysia ramte hian hun rei tak atang tawhin inthian thatna an nei tawh a. An ram chanchin hlui, khawsak chhoh dan leh nunphungah inzawmna an nei a. Malaysia-ah hian Indian maktaduai 2.9 awmin hei hian an inkar a titha zual a, khawvela ram danga Indian an awm tamna ber pathumna a ni phak a ni.
India-Malaysia hi kawng tam taka inkungkaihna siam nghet sa an ni tawh a, an huang an zauh mek zel bawk.
External affairs ministry thuchhuah chuan prime minister-in a tlawh hunah hian hruaitu pahnihten an inkara thawhhona kalpui thil hrang hrang, sumdawnna leh investment, venhimna, himna leh tuipuia an hmalak dunna atanga digital leh financial technology, energy, healthcare, zirna, nunphung, tourism, an mite inpawhna thlengin thil hrang hrangte an thlir ang a; huang zauhna tur te, nakina an pahniha an hlawkpui theih tur thila hmalak thar dan turte an sawi dun dawn tih a tar lang.