Aizawl: Revd Lianzira ziah, Mizo tobul chhuina ‘Zofate Genesis (BC 2200 – AD 1779)’ tih chu Zirtawpni khan I&PR Auditorium-ah T.J. Lalnuntluanga, Minister hlui chuan a tlangzarh.
He lehkhabu hi Revd Lianzira hian Asia ram hrang hrang leh Burma ram chhunga a awm laia a ziah a ni a, kum 10 liam ta daiha a ziah tawh niin, Mizo tobul chu BC 2200 atanga chhui tannin AD 1779 thleng a chhui a ni.
Tlangzarh inkhawm hi Dr. H. Laldinmawia, HoD, Department of Mizo, Pachhunga University chuan a kaihruai a. Dr. Malsawmdawngliana, Asst. Professor, Department of History, Govt. Aizawl West College chuan lehkhabu hi a thlirlawk a. “Zofate Genesis tih lehkhabu hi Revd Lianzira hian, lehkhabu chi hrang hrang 200 chuang leh mi 40 chuang a kawmna atang ziak a ni a, chuvang chuan Mizo tobul chungchanga innghahna tlak leh rintlak lehkhabu niin ka hria,” a ti.
Lehkhabu tlangzarhtu, TJ Lalnuntluanga chuan, “Pu Lianzira hian Zofate tan, rambuai hmunah te, harsatna hrang hrang tam tak paltlanga Zofate hnuhma hmun hrang hrang Mongolia, China, Tibet leh Burma (Myanmar) te a ziaktuin a theih chin chin te, a hmun ngeiah a kal chilh a, ram buai deuh lai Burma lamah pawh kehkhabu hmunpui hrang hrang tlawh ngat ngat a, man hlauhawm hun tam takah a tawng a, chutianga a thawhrimna avangin Zofate tan lehkhabu rotling hi kan neih theih phah ta a ni. He lehkhabu hi research scholar leh history la ziak turte tan pawh lehkhabu rawn tlak leh tling a nih ngei ka ring,” tiin a sawi bawk.