Aizawl: Central YMA President R Lalngheta chuan Mizo hnam tlem tê, chibing tetea inla hrang lova hmun khata awm turin a sawm.
Lamka Branch YMA Hall, Hmuia Venga Manipur Group YMA in Inkhawmpui vawi 41-na a neih a tawp zan, Zirtawpni zan khan Central YMA President R Lalngheta chuan thu sawiin, Mizote hi hnam tlem te an ni a, YMA chuan he hnam tlemte hi pumkhata a awm a duh ber tih a sawi.
R Lalngheta chuan, “Inpumkhatna tur chuan nang leh kei hi kan pawimawh a, chibing te te a in la hrang lovin hmun khat a awm turin ka sawm duh che u a ni. Mizoah hian hnam hrang hrang kan awm a, i inpumkhat ang u, unau kan ni a, i in do lo ang u,” a ti a. Mizo hnam peng hrang hrangten an tawng theuh te humhalh a, chutihrualin an inbiakpawhna tawng tlang lawn erawh an thiam tlan a tul thu a sawi bawk.
Ruihhlo do chungchangah an tanrual a ngai a, ti hne hne lovin huai taka do turin YMA memberte a sawm bawk.
Manipur Group YMA Inkhawmpui hman pui turin Central YMA President R. Lalngheta leh Prof. Malsawmliana, General Secretary te hovin CEC member 20 an kal a, Tuiphal Group YMA te an kal bawk.