Aizawl: Manipal Hospitals chuan February 5-6, 2026 chhung khan Kolkata-ah North East Media Conclave an buatsaih a, hmarchhak state panga atangin chanchinbumi 11 an tel a, Mizoram atangin mi pathum an tel.
Mizoram atanga telte hi MJA General Secretary K Zothanpara, Ex-Officio Vanlalrema Vantawl leh member PC Zonuntluangi te an ni.
February 5 chawhmaah Manipal Hospitals EM Bypass (Medica Superspeciality Hospital thin)-ah inlawmna leh inkawmkhawmna hun hman a ni a, Manipal Hospitals EM Bypass-a hotu lute leh doctor eng emaw zatin thu an sawi.
Chawhnu lamah Manipal Hospitals pahnih – EM Bypass leh Mukundapur hmunhmate chipchiar taka fan a ni.
Manipal Hospitals hrang hrangah India hmarchhak mi 9,200 chuang an enkawl tawh thu an sawi a; hmarchhak state hrang hrangah zuk leh hmuam bakah, ei leh in avangin cancer a tam nia an hriat thu an sawi uar hle.
Manipal Hospitals EM Bypass hotuten robotic surgery an tih nasat tawh thu an sawi a; cancer enkawlna lam an ngaih pawimawh thu leh an that tawk thute an sawi. Cardiology, thluak lam (neurology), ruh lam, kal lam (nephrology), chuap lam leh pum leh ril lamah te doctor tha tak tak an neih thu an sawi bawk.
January 6-ah Manipal Hospitals dang pahnih – Broadway leh Salt Lake te tlawh leh a ni a. Manipal Hospitals Broadway hotute chuan, hmarchhak mite an ngaih pawimawh thu an sawi a, “NE mite ei duh zawng a danglam a, an duh ang chaw kan ngaihtuahsak thei a. Kan nursing staff zinga 60% vel chu hmarchhak mi an ni,” an ti.
Manipal Hospitals hian India rama khawpui 24-ah damdawi-in 49 an nei mek a, an hmunpui chu Bengaluru a ni a, Kolkata bikah damdawi in panga an nei.
Kolkata-a Manipal Hospitals-te:
- Manipal Hospitals – EM Bypass (Medica Superspeciality Hospital thin) – Khum 500
- Manipal Hospitals – Mukundapur (AMRI Hospital thin) – Khum 319
- Manipal Hospitals – Dhakuria (AMRI Hospital thin) – Khum 210
- Manipal Hospitals – Broadway (AMRI Hospital thin) – Khum 220
- Manipal Hospitals – Salt Lake (Columbia Asia Hospital thin) – Khum 95