Mizoram Larsap General (Dr) Vijay Kumar Singh chuan Inrinni khan Aizawl Lammuala State Level Ex-Servicemen Rally buatsaih a hmanpui a, Mizo mipui leh sipai inkarah muanna, remna leh inzahtawnna a awm chu lawmawm a tih thu a sawi.
Assam Rifles buatsaih sipai bângte intawhkhawmna, Ex-Servicemen Rally-ah hian larsap chuan ram tana sipai bângte huaisenna, inthununna leh hnaa inpekna chu entawntlak a tih thu a sawi a. Mizoram sipai bângte chu India rama ex-servicemen a hmuh tawhte zinga inchei nalh leh zahawm ber an nih thu sawiin, “Hei hi ex-servicemen-te inchei dan tura mawi leh entawntlak a ni,” a ti a. Mizo mipui leh sipai inkarah muanna, remna leh inzahtawnna a awm chu lawmawm a tih thu sawiin he intawhkhawmna pawh hi inzahtawnna, inrinngamna, thawhhona leh induhsaktawnna lantirna a ni tih a sawi.
Larsap chuan sipai bângte chu an nunah mahni inphatna leh inpumpekna entirna ataka hmuh theiha a awm thu sawiin, sipaia an tan hun chhung zawngin chhungkaw bulah pawh awm lovin hmun hrehawm tak takahte an awm kual a, anmahni avangin mipui an him thin a. Hetiang taka ram tana tangkai an nih avangin Mizoram sorkar pawhin sipai bângte leh an chhungte hamthatna a ngaih pawimawh thu a sawi.
He hun hmanpuitu, Home Minister K Sapdanga pawhin sipai bângte chu ram tana an thatlai hun tam zawk hmanga ram ralti leh hrehawm tak taka awm thinte ngaihsanawm a tih thu sawiin, duty an dah pawimawh hmasa tlat thin chu fakawm a tih thu a sawi a. Mizoram mipuiin sipai bângte inpekna an hriatreng tawh dawn thu sawiin, tunah ralthuam tung rih mah se, khua leh tui entawntlak an nih chhunzawm zel thu a sawi.
He hunah hian Maj Gen Inderjit Singh Bhinder, Inspector General, Assam Rifles (East), Lt Gen Abhijit S Pendharkar, Corps Commander, 3 Corps leh Lt Col Clement Lalhmingthanga (Retd), MLA, President, Mizoram Ex-Servicemen League (MESL) te thu an sawi a. Ex-servicemen (ESM) pakua, sipai huaisen chawimawina dawng pakhat chhungte leh ram tana nun hlantu sipai nupui (Veer Nari) pangate hnenah chawimawina leh tanpuina hlan a ni bawk.