Mizoram Universal Healthcare Scheme (MUHCS) changtlung zawka kalpuina tur Asian Development Bank (ADB) pawisa USD maktaduai 108 (Rs vbc 800 vel) a puk tur (loan) chu ziah fel (sign) a ni ta.
Thawhlehnia Mizoram sorkar Fainance department thuchhuahin a tar lang danin, ADB loan pumpui hi Ministry of Finance hnuaia Externally Aided Projects (EAP) hnuaia hmuh a nih avangin sorkar laipui rulh tur a ni.
Sorkar laipui Ministry of Finance-in a rulhna tur interest rate hi Secured Overnight Financing Rate (SOFR) tih niin, kum khatah 3.6% vel bawr ni tura chhut a ni a. Central sorkar hian loan pumpui atanga 90% hi grant angin Mizoram a pe ang a, 10% (Rs vbc 80) hi Mizoram sorkar hnenah loan anga Mizoramin a rulh ve turin a puktir chhawng dawn chauh zawk a ni.
Mizoram sorkarin he 10% a rulh ve tur chin a rulhna tur interest rate hi chu Central sorkar Ministry of Finance in a la ruahman tur a ni a, State Development loan (OMB) ang vel tura beisei niin 7-8% interest vel tur a ni ang.
MUHCS atana ADB atanga sum puk hi thil danga hman tur a ni lo va, MUHCS Corpus Fund atan chauha hman tur a ni. Loan amount atanga 90% lai sorkar laipuiin a rulh dawn avangin MUHCS atana State sorkar sum sen chu nasa takin a tlahniam dawn nia tar lan a ni.