Aizawl: Mizote ranvulh hrang hrang vulhtute chu sorkar flagship programme Bana Kaih hnuaiah a thlawnin animal insurance tumsak vek an ni dawn.
Thawhlehnia Planning & Programme Implementation Dept. Committee Room-ah Mizorama ran vulhtute tan National Livestock Mission chu AH & Vety Minister C Lalsawivunga chuan a hawng a. He hunah National Insurance Company Ltd. nen thawhdunna tura inremna (MoU) ziah a ni a. Animal insurance hian ranvulh hrang hrang (vawk, bawng, sial, kel, beram) a huap dawn a ni.
Hawnna inkhawmah AH&Vety minister chuan animal insurance-a Mizoram sorkar tum ve tur (SMS) 30% ni thin chu 10%-ah tihhniamsak tura union minister-a an ngenna chu tihhlawhtlinsak an ni a, tun an tlangzarh tak, National Livestock Mission hnuaiah hian sorkar laipui atangin Rs. nuai 66.49 hmuh tawh niin hei hi a thawh khatna tur chauh a ni tih a sawi.
A thawh khatna an dawn atang hian ran 4,545 insure tum a nih thu sawiin C Lalsawivunga chuan, “He animal insurance hian Mizote ranvulh hrang hrang – vawk, bawng, sial, kel, beramahte premium zaa 15 chu ran vulhtuten an tum ve tur ni mah se, Bana kaih Policy hnuaia vulhtute chu tumsak vek an ni ang,” a ti.
C Lalsawivunga chuan vawksaah Mizoram a intodel dawn meka an hriat laiin African Swine Fever (ASF) leng avangin vawk vulhtuten an tuar nasa a, hei hian Mizoram economy nasa takin a ngawng a, tun thlenga an chhut danin ASF avanga sum hloh chu Rs vbc 960 a tling tawh tih a sawi a. Hemi avang hian ZPM-in sorkarna an chan ve leh animal insurance atan theihtawp an chhuah nghal a, ASF tuarte zangnadawmna pawh a theih ang angin an kalpui tih a sawi bawk.
National Livestock Mission hawnna hi MSPCC Vice Chairman Dr. KC Lalmalsawmzauva’n kaihruaiin National Insurance Company Ltd. leh AH&Vety Department Secretary Lalsangliana ten inremna tura thawhhonna hi an ziak a ni.