Lawmman Rs. nuai 15 sem chhuahna tur, Inrinnnia Aizawl International Half Marathon (AIHM) 2026-ah Africa khawmualpuia mite bakah England leh France atangin tel tum an awm a, ram dang mi 20 chuang tel tura ngaih a ni.
Nikuma hlawhtling taka buatsaih tawh, AIHM-ah hian category pakuaah inelna a awm dawn a, lawmman sem chhuah tur hi Rs. nuai 15 a ni dawn a. Category pakua awmah pakhatna atanga pangana thleng pek an ni dawn.
Nilaini khan Home Minister K.Sapdanga chuan a pisaa thuthar lakhawmtute hmaah AIHM 2026 t-shirt a tlangzarh bawk.
Mizoram sorkara sports department nena AIHM 2026 buatsaihtu, Innovation India CEO Captain Rahul Bali-a chuan t-shirt tlangzarhna hmunah hian Kenya, Ethiopia, Bahrain leh ram dang atangin mi 20 chuangten an telh theih tur an tichiang tawh tih a sawi a, visa pawh an nei tawh niin a sawi.
Ram dang mi tana Mizoram lut tura Protected Area Permit (PAP) a ngaih avangin India an thlen ve leh buaipui a ni ang a, an neih theih ngei pawh an beisei tih Bali-a chuan a sawi.
Bali hian Nilaini tuka phone call a dawnah chuan England leh France atang pawhin tel an tum tih an hrilh tih a sawi bawk.
AIHM 2026 hi tel tuma online-a inziak luh theihna hun chu Nilaini tlai khan khar a ni a, offline erawh chuan Ningani leh Zirtawpni hian Lammualah tih theih a ni dawn a; junior leh senior huang bik phe chu offline chauha inziah luh theih a ni.
AIHM 2026-ah hian inelna hautak ber, km 21 intlansiak mipa leh hmeichhiaa pakhatnain Rs. 2,00,000 ve ve an dawng ang a. Pahnihnain Rs. 1,50,000 ve ve, pathumnain Rs. 75,000 ve ve an dawng bawk ang.
Km 10-a thui intlansiakah mipa leh hmeichhia pakhatnain Rs. 75,000 ve ve, pahnihnain Rs. 50,000 ve ve leh pathumna Rs. 25,000 ve ve an dawng ang.
Km ngaa thui intlansiak chu mipa, hmeichhia, senior bakah mipa leh hmeichhia naupang tan tlan theih tura ruahman a ni a. Heng category pangaa pakhatna hian Rs. 20,000 theuh, pahnihnain Rs. 12,000 theuh leh pathumnain Rs. 10,000 theuh an dawng dawn a ni.
AIHM 2026-a tel tur hian inziah luhna Rs. 799 niin ram pawn mi tan $ 30 a ni a. Naupang leh senior bik chu inziah luhna man chu Rs. 499 a ni thung.
AIHM hi a vawi khat nan nikum April 26 khan buatsaih niin mi 1,500 vel an tel a. Athletics Federation of India (AFI)-in a pawmpui niin Sports Authority of India (SAI)-in a hriatpui a ni bawk.
Intlansiak hi zing dar 06:30-ah km 21-a thui tlan turte vai liama tan a ni ang a. Minute 15 dan zelah category dangte hian an zui tura ruahman a ni a. Rajiv Gandhi Stadium, Mualpui, Aizawl atanga tlan tanin hetah bawk hian a tawpna pawh a ni dawn a ni.