Aizawl: Mizoram State Commission for Protection of Child Rights (MSCPCR) hotuten Delhi-ah mamawh thlen.
Thawhlehni khan MSCPCR Chairperson Jimmy Laltlanmawia leh a thawhpuite chuan Delhi-a National Commission for Protection of Child Rights (NCPCR) tlawhin, an hotute an kawm a. Dr. Sanjeev Kumar Sharma, Member Secretary, Commission member leh thawktuten an lo dawngsawng a ni.
An inkawmnaah hian MSCPCR hotute’n Mizoram mamawhte leh Mizorama naupangte himna leh hmasawnna tur thil pawimawh tak takte an thlen a. Mizoram atanga tul leh mamawh an thlen te a theih ang anga tihhlawhtlin a nih theih nan thuk zawka thawhhona tur chungchang an sawi ho a. Heng bakah hian National level-a rualkhai zawka kal theihna tur atana rawtna an thlente pawh NCPCR chuan an bawhzui nghal tur thu leh hemi atan hian National level meeting koh thuai a nih tur thu Member Secretary chuan a lo hrilh.
MSCPCR hotute hian nimin khan Delhi State Commission for Protection of Protection of Child Rights (DSCPCR) an tlawh bawk a, anni nen hian a tul huna thawkho tur leh information inpek tawn kawngah te thawhho a nih theih nan theihtawp chhuah tlan ni se, an tih bakah, a tul anga intlawhtawnna leh inzirtawnna te neih thin ni se an ti.
MSCPCR hotute hi an Chairperson Jimmy Laltlanmawia bakah, Darthakunga, member leh Lallianzuala Chawngthak, Superintendent te an kal a ni.