Aizawl: Assembly Budget Session neih tura hun hman dan tur duangtu, Business Advisory Committee chu an Chairman Lalbiakzama, Assembly Speaker hova Nilainia thukhawmin session hi February 17-ah tanin March ni 16, 2026 thleng a awh dawn.
Mizoram Assembly Budget Session tanni hian Larsap, General Vijay Kumar Singh chuan thu a sawi ang a, a thusawi chungchanga lawmthu sawina, motion of thanks put luh zui a ni ang.
February 18-ah February 8-a boral, kum 1972-77 chhunga MLA lo ni tawh, KL Rochama sunna hun hman a ni dawn a. February 26-ah finance changtu, Chief Minister Lalduhoma’n kum 2026-27 budget a pharh ang.
Nilaini thleng khan he session atan House chunga chhan chi zawhna, starred question 973 leh ziaka chhan chi zawhna, unstarred questions 339 a lut tawh a, hei hi session-a zawhna luh tam ber tum a la ni a, Bill pathum a lut tawh bawk.