Pep Guardiola chuan Manchester City-in ‘Arsenal hnaihchilh an tum zel dawn’ tih sawiin Premier League hmahruaitu nena nomawi an inchuhnaah tha thlah mai an tum lo tih a sawi.
City hian tun season lovah pawh an hmaa mite pawh thlak an lo nei tawh thin.
Pathianniah champions lai, Liverpool lakah si phur hmasa zawk ni chungin an lehthal a, Nilaini zanah chawlhlawk hmain Fulham an tukdawl fel der bawk.
Guardiola-a hote hian Gunners hi point thum chauhvin an thlau leh hman a, a sang pahnihten nomawi an inchuhna boruak a nung thar mek.
Mikel Arteta-a kaihhruai team-in Ningani zan khan Brentford an tlawh ve bawk a, he chanchin i chhiar lai hi chuan point rukin City an lo tlansan leh tawh mai thei bawk.
Guardiola chuan tun ang huna champion leh ‘pion loh sawi rik a la duh lo va, “Anfield-a kan khelh hma khan point kuain kan hnufual lo va, Brentford v Arsenal inkhelh hmain point thum chauh kan karah a awm tihna pawh a la ni hel lo va, a la hriat dawn chauh,” a ti.
“Ka sawi fo thin angin kan tum chu hma lam pan zel a ni a, chu chu minute 90 chhunga kan khelh that tluan dan, kan that zawk dan leh player-ten kan tih duh an tih a lanna a ni,” a ti a. “Rilru lama teh chuan kan ti a, kan tlarhnung leh hma lam pawh a dik a, chu chu kan tih chu a ni mai,” a ti.
Anfield-a hnehna an chan rual khan City leh Guardiola hian an season tha ber an hmang lo chungin Arsenal an la pawt thla thei nia inngaihna an nei a tih theih.
City hian hun khirha hlawhtlin dan kawng an hre tawh a, season riat liam ta chhungin vawi ruk an champion thei a. Arsenal pawhin season thum chhung a zawna pahnihna nih an tum lo ve bawk.
Nilaini zana City an chak hnuah Arsenal hian Bees an tlawh hmain phur rit tak an phur a tih theih a; mahse, G Tech Stadium atang hian point thum an hawn thei a nih chuan karleh Nilainiah a hniam bera awm, Wolves an hmachhawn zui dawn a, point kuain Guardiola team an tlansak leh thei dawn tih an hre tel thei bawk.
Team pahnih hi Carabao Cup final-ah March 22-ah an inkhel dawn a, hei hi rilru lama elpuite hnehna pawimawh a ni dawn bawk.
EFL Cup hnuhnung 12-a champion zinga pasarih hian nomawi dang an la tel zel a, thla thara Wembley-a nomawi lak hian nghawng tha a nei thei dawn tih a hriat viau bawk.
Premier League-ah April thla hian Etihad Stadium-ah an insu dawn bawk a, Champions League leh FA Cup-a an chak zel chuan vawi thum dang an la insu thei dawn bawk.
Arsenal hian thlasik bazarah tumah an la lut lo va, City-in Antoine Semenyo la lutin goal nga a thun der tawh a. England international Marc Guehi la lut bawkin ani pawh goal an chhuah loh nana mi tangkai a ni.
Guardiola chuan an ‘thang zel’ tih sawiin, “Kan inpumkhat tha a, ball kan kenin hahdam takin kan awm thei a, chhung lam leh a sir lamah pawh kan tlan tha,” tiin Fulham lakah an khelh that thu a sawi bawk.