Labour Employment Skill Development & Entrepreneurship (LESDE) Department buatsaih, LESDE Kût 2026 chu Inrinni khan Aizawl Lammualah hman a ni a. LESDE department changtu minister, Lalnghinglova Hmar chu khuallian a ni.
Lalnghinglova Hmar chuan kût chu kuthnathawkte, thiam thil neite leh hna zawng mekte puala buatsaih a nih thu sawiin, department inhmelhriattirna leh sawrkar hnuaia hamthatna hrang hrang an dawn theihte pho lanna hun a nih thu a sawi.
Mizoram chu entrepreneurship leh thiam thil zir kawngah hma a sawn rualin thil tha zawk leh danglam zawk ngaihtuah chhuaka siam chhuah tum zel turin kalkhawmte a fuih a. Kût a hlawhtlin theih nana thawktute leh a hluttu mipuite hnenah lawmthu a sawi bawk a ni.
LESDE Director John Tanpuia’n kût report pein Thawhlehniah Governor Dr. Vijay Kumar Singh-a’n a hawng a, Mizoram Building & Other Construction Workers Welfare Board (MBOCWWB) hnuaia scheme pahnih, Eizawma Kailawn leh Rahbi Chertu chu a hawng.
Ni hnihnaah State Level Vendor Development Programme, Public Sector Unit 5 —P ower Grid Corporation of India Limited, National SC/ST Hub Guwahati, Department of Food Technology Mizoram University, Mizoram Rural Bank (MRB), Food Corporation of India-te hnen atangin seminar neih a ni a. Pradhan Mantri National Apprenticeship Promotion Scheme (PM NAPS) pawh neih niin establishment 20 vel leh apprentice 100 chuang vel an inziak lut.
Ni thumna atangin intihlimna hun hman tan a ni a, skill development atanga designer palite (Valkia, Mahlui, Teremi leh Tluangpuii Hmar) kutchhuakte model-ten pho chhuahsakin live concert neih a ni.
Kûtah hian stall 162 hawn niin 11 chu Mizoram pawn atangin a ni a. Zirtawpni thlenga chhinchhiah danin kuthnathawkte leh hna zawng mek mi 234 sorkar scheme hrang hrang hnuaiah an inziak lut a, mi 28-in hna an hmu a, health check-up mi 1,000 chuangin a thlawnin an ti a. Stall hrang hrangte inhralh zat chu Rs. nuai 35 vel a ni.
Kût kharnaah hian district tina skill development leh entrepreneurship lama mi hlawhtling thlanchhuahte hnenah District Skill & Entrepreneurship Award 2025–2026 pek an ni a. Guwahati-a January 19-22 chhunga Regional Skill Competition neih zawh taka Mizoram atanga medal la mi 21-te hnenah chawimawina pek a ni bawk (a dawngtute hi phek hnihnaah dah a ni).
Kût kharna hi LESDE Secretary Dr. Lalhriatzuali Ralte-in a kaihruai a. MLA Er. Ginzalala leh MLA Baryl Vanneihsangi te pawh an tel.