Badminton World Federation (BWF) Council chuan badminton khelh dan phung chu thlak danglam an rawt a, April 25-a Annual General Meeting an neih hunah thutlukna an siam ang.
November 8, 2025-ah khan BWF Council chuan 3×21 hmang tawh loin 3×15 hman ni tawh se tiin rawtna an siam a. Hetianga khelh dan an hman chuan inkhel pawh a hmuhnawm zawk dawn bakah a inkhelte pawh an tang lehzual turah an ngai.
Khelh dan phung hman tura an ruahman hi national leh grade 3 tournament velah an en chhin phawt a, chu mi hnuah nikuma Guwahati, Assam-a BWF World Junior Championships-ah pawh khan an hmang a ni.
BWF President Khunying Patama Leewwadtrakul chuan, “Kan mawhphurhna chu inelna chi hrang hrangah leh khawvel hmun hran hranah badminton hi a thang zual zel tur a ni a. Chutiang a nih theih nan chuan hma kan sawn theih dan tur kan ngaihtuah reng a, 3×15 pawh hi hmasawnna thlentu a nih ngei kan ring tlat a ni,” a ti.
“Player-te tan a tha dawn a, inkhel pawh a hmuhnawm lehzual ngei dawn a. Inkhel a hmuhnawm phawt chuan khawvel hmun hrang hrangah badminton duhtu pawh an pun belh zel kan ring a. Hun rei zawk atan thil kan thlir a, player-te duhthusam thlentir hi kan tum ber niin, hun rei zawk badminton an khelh theih dan kan ngaihtuah a ni,” a ti bawk.
An zir chiannaah BWF chuan khelh dan phung an thlak danglam chuan game khel rei lutuk leh ninawm lutuk a awm hman dawn lo niin an sawi a. Hei bakah hian inhnehtawk taka inkhel a tam phah dawn niin an sawi.
Khelh dan phung thlak hunah chuan inkhelh hun chhung pawh chhut chhuah a awlsam phah dawn niin BWF chuan an sawi a. Heti a nih chuan ruahmanna siam lawk a awlsam sawt ang a, tournament khelh pawh a kal tluang lehzual dawn nia an ngaih thu sawiin, a hma aiin ruahmanna a fel fai zawk dawn nia an ngaih thu an sawi a ni.
Kum 2002 hma lam kha chuan badminton chu best-of-three game niin, mipa tan 15 chu game point niin, hmeichhe tan 11 a ni thung a, service-tute chauhin point an hmu thei thin.
Kum 2006 khan 3×21-in an thlak danglam bakah a service-tu lo pawhin point an hmu thei tan a. Kum 2014 khan BWF chuan 5×11 hman an rawt a, a tlang ta lo va. Kum 2021-ah pawh 5×11 hman hi an rawt leh a, a tlang ta chuang lo a ni.