Aizawl: Chief Minister Lalduhoma chuan Thawhlehni chawhnu khan Lengte kai Tlawng lei, meter 100-a sei, meter 7.5-a zau, a sir tawna mihring kalna tur metre 1.5-a zau nei, metric ton 385 dawl zo, Ministry of Road Transport & Highway sum Rs. vaibelchhe 43.83 senga dawh, Faith Bridge tia a hming vuah chu a hawng.
A hawnna inkhawmah chief minister chuan kawng chi hrang hranga a tangkai theih dan tur a sawi a, “A pawimawh a, kan ram hmel lannna a ni bawk,” a ti.
“Awlsamna tam tak min thlen dawn a, kan ram economy chawikanna kawngah a tangkai hle ang,” a ti bawk.
Lei dawh nan hian MoRTH-in Rs. vaibelchhe 42.44 a sanction a. A lei chhuat pawh kai tak rih zawng hi 430 MT a ni a, khawvela hrui hmanga lei thir hnuh kai rit ber zinga mi nia sawi a ni.
Bridge dawh chhûng hian hna thawhna hmanrua leh hna thawhte quality test reng a ni a, a bulah site laboratory dah a ni a. PWD atang leh contractor atangin laboratory assistant-ten test chi hrang hrang an kalpui a. Rawra leh balu hi Silchar atanga lak luh hman a ni a. Cement OPC 43 leh OPC 53 hman a ni.
Bridge structure hi Rourkela-a siam a ni a, a part hrang hranga phurh thlen niin zawmkhawm chawp a ni a. A hanger atan hian Thailand-a a bik taka siam carbon steel tension rod hman a ni a. Dawh zawh a nih hnuah load test neih a ni a, result a tha a, lirthei eng chi pawh a tlan thei.
Lei hawnna inkhawm hi V. Lalsangliana, Commissioner & Secretary, PWD-in a kaihruai a, Vanlalhlana, PWD Minister leh TBC Lalvenchhunga, Adviser to CM ten thu an sawi a, minister te, MP (LS) leh MLA eng emaw zat an tel.