Aizawl: Congress ṭhalai (MPYCC) chuan Thawhlehni chhun khan Vana Pa Hall kawt, Aizawlah electric bill tihsan duh lohna lantirin an pung khawm.
Thuchhuah an siamah ZPM party chu kum 2023 MLA inthlan dawn khan electric Bill tisang ve lo turin an inzuar a. An sorkar hnuah pawh Power & Electricity Minister F. Rodingliana’n department hotute a kawmnaah kum nga chhunga power-a intodelh an tum thu leh bill tihsan a nih loh tur thu a sawi a. Thenzawl Solar Power Plant hawnnaah pawh Chief Minister Lalduhoma pawhin bill an tihsan loh tur thu a sawi bawk niin an tar lang.
ZPM party chu lal hrim hrim duh vangin khawvel leh India-a Mizoram aia kum za tam tak kal tawhte dinhmun hmangin sorkar kal tawhte an teh a, chumi hmanga ti ve lo tur anga inzuar niin an sawi a. “Delhi-ah kum 2014-a AAP-in sorkarna an siam khan an intiam angin mipui phurrit chhawk nan electric bill an tihniam a. Hydel Project Megawatt khat pawh la siam chhuak lo ZPM sorkar kan hrawn mek hian sorkar kal tawhte ngainep zawng leh engmah ti lo anga an sawi thin hi Congress Thalai chuan pawi a tiin power lamah ka ang ve tawh lo turin a duh a ni,” an ti.
ZPM sorkar chu electric leh bill dang tihsan loh an intiamna bawhchhiain an nawmchenna atan nasa takin an tisang nia sawiin mipui zah lohna leh palzutna dik takah an ngai tih an sawi.
“Hetianga mipui harsatna sutkianna pawh awm lo va power lama bulb pakhat chhitna pawh la din eih lo sorkarin Mizoram rohlu kan neih chi hrang hrang hralh zawnga hma a la a, Tuirial Hydel Project pawh hralh a tum leh zel hi mahni nawmchenna atana chhungkaw pa berin inchhung bungrua a hralh nen thuhmun reng a ni,” an ti a. Mipui tawrhna thlen zawnga ZPM sorkar a kal zel dawn chuan na takin a do zel dawn a ni tih an hriattir tih an sawi.