Aizawl : Assam Rifles leh Lunglei Police tangkawpin Pathianni zing khan Champhai Sumo service atangin Heroin an man a. Lunglei mi hmeichhe pahnih leh Champhai lam mi pahnih an man.
Thudawnnain a tar lan danin, Lunglei Police DSB leh AR tangkawp hian Pathianni zing dar 4 vel khan Champhai sumo hi an dap a. Heroin nia hriat, sahbawn bawm pariat chhunga dah gram 94.42 an man a. An ruihhlo man hi Rs 18,88,400 man hu nia chhut a ni.
Police te hian Sumo a chuang, Lunglei mi hmeichhe pahnih – Lalthanpuii (48) d/o Hniarvunga, Farm veng leh Ruthi Sangziki (55) d/o Lalmanga, Ramthar veng, Lunglei bakah Laltanpuii (24) d/o Lalramhluna, Champhai Zotlang leh Sumo khalhtu, Lalhmangaihzuala (34), s/o J Lalhnaia, Champhai Dinthar veng te an man.