Aizawl : Mizo Zirlai Pawl (MZP) hmalaknain College SU leh Hnampual Zirlai Pawl thenkhat hruaituten Inrinni khan Aizawl khawpui chhungah hnam dang Inner Line Permit (ILP) an endik a, dan bawhchhia mi 68 an man.
ILP endiknaah hian MZP bakah Govt. Aizawl North College, Govt. Johnson College leh Govt. T. Romana College bakah Bawm leh Pang zirlai pawl hruaitute an tel a. Kulikawn, Dawrpui, Vaivakawn leh Bawngkawn-a hnam dang ILP an endikna atangin ILP nei lo leh fel lo mi 68 an man a, heng mite hi thuneitute kutah an hlan nghal.
MZP hruaitute chuan, dan bawhchhia an man zingah hian ILP-a Mizoram an lo tlawh chhan nen inmil lo lutuka hnathawk tam tak an awm a, hnam dang, hnam dang vekin an sponsor pasarih man an ni bawk a, hengte hi MZP chuan mak an tih thu sawiin, hemi chungchangah hian sorkar thuneitute pawh hma la nghal tur leh ILP pekchhuah kawngah a tidik lotu an awm a nih chuan chhui chhuaha hremna pek ngei an phut tih an sawi.