Aizawl : MPCC General Secretary PC Laltlansanga chuan thamna dawngtu tan chuan Congress chu a hlauhawm zel dawn tih a sawi.
Thawhtannia MPCC in Congress Bhavan-a Political Session hun an hmanah thu sawiin MPCC General Secretary PC Laltlansanga chuan, “Thil tisualtu, thamna dawngtu tan chuan Congress hi a hlauhawm zel ang. Kan CM hian Congress a hlau a nih chuan amah lo inenfiah rawh se,” a ti.
Sorkar sikul hungna chhunglam feet 300 chu rawng eng (yellow) hnawiha chhinchhiah vek turin sorkarin order an siam tih sawiin PC Laltlansanga chuan, “Education hmasawn nan ZPM party flag rawng kher hman hi a mak hle,” a ti.
PC Laltlansanga chuan February ni 21, 2025-ah CM in Assembly House-a Lengpui Airport bul ram hralh tum nasa taka a dem hnu lawkah, ZPM sorkarin rang taka file a kaltir leh si a, hun reilote chhunga payment an pe leh si te hi thil mak tak a ni. India rama compensation file kal chak ber a nih a rinawm tih a sawi a. Heti taka rang leh chaka file a kal theihna chhan hi Rs vbc 117 vang tih sawiin, “He sum hi thamna sum a ni,” tiin, Lengpui VC leh NGO atangin NOC awm angin a sawi chu CM hian a copy phawrh ngei turin a phut bawk.
Lengpui Airport bul ram lei leh hralh chu MNF sorkar laia tihfel hman ni se, tute emaw chuan an hlawkpui viau ang tih sawiin MPCC GS chuan, “Khatihlai CM, Revenue Minister leh Chief Secretary te hming kan CM hian a sawi bawk a. Rem leh rem lovin hmai phihna tur a zawng a ni ber,” a ti.
“Pu Lalnunmawia Chuaung Chief Secretary a nih lai khan Air Vice Marshal B. Chandra Sekhar chuan lehkha thawnin hmala turin a rawn ngen a. Chief Secretary chuan notesheet-ah Lengpui Airport bulah ni lovin chhim lam Lunglei district ah ram hi zawn nise tiin file hi a lo ziak a, chubak chu IAF hnena ram hralh chungchangah hian Pu Lalnunmawia Chuaungo hian kuthnu engmah a nei lo. Chief Minister hian ngaih kawih theih tura thu thluaithlum hi sim hmak rawh se,” a ti bawk.
PC Laltlansanga chuan, Lengpui Airport bul ram lei leh hralhah ZPM an sorkara a tifeltuah an tang ta zawk tih sawiin, Rs vbc 17 dawngtuin a ta tur vek a ni lo, state leh central lamah mantang pek tur a ngah thu a sawi tih a sawi a. “Tu nge hausakpui ta hi chhui a ngai a ni. Duh ni se, ZPM khan MNF sorkar hma lo lak tawhnate cancel turin hun a ngah lutuk,” a ti bawk.