Aizawl : MNF Legal Board Vice Chairman Lalpianfela Chawngthu chuan Lengpui ram Indian Air Force (IAF) hnena hralh chungchangah chief minister leh ZPM sorkar chuan thudiklo tam tak sawia dan pawisa loah a puh.
Thawhtannia MNF Hnam Run chhung inkhawma Political Session-ah thu sawiin Lalpianfela chuan, Lengpui ram IAF hnena hralh chungchangah Chief Minister leh ZPM sorkar chuan thudiklo tamtak sawiin, dan an pawisalo hle tih a sawi a. “ZPM sorkar chuan ram danpui leh Mizoram Legislative Assembly-in a adopt, Right to Fair Compensation and Transparency in Land Acquisition, Rehabilitation and Resettlement Act, 2013 (RFCTLARR Act, 2013) chu nasa takin a bawhchhia a. He ram lakna kalpui danah hian eirukna lian tham a awm ngei a ni tih chiang takin a lang a. MNF chuan he thil thleng hi pawi kan ti hle a ni,” a ti.
MNF Gen. Hqrs General Secretary ni bawk Lalpianfela Chawngthu chuan, ZPM sorkar hian SIA Exemption diklo takin an kal pui tih a sawi a. RFCTLARR Act, 2013 hnuaiah Social Impact Assessment (SIA) awltir tur chuan India Parliament pawmpuina a ngai a, chu chu Appropriate Government (Central Govt) thuneihna a ni. Mahse, ZPM sorkar chuan Mizoram Revenue Minister approval chauh hmangin dan kalhin exemption a pe a. Hearing of Objection (Section 15) bawhchhiat na a ni tih a sawi.
RFCLRR Act, 2013 section 15 hnuaiah hian ram lak/hralh a nih dawnin Collector chuan Rule 6 of ‘The Right to Fair Compensation and Transparency in Land Acquisition, Rehabilitation and Resettlement (Compensation, Rehabilitation and Resettlement and Development Plan) Rules, 2015’ in a sawi angin Hriattirna/Notice Form III hmangin a tichhuak tur a ni a. He land acquisition chungchanga remtihlohna/dodalna neite chuan Preliminary Notification tihchhuah atanga ni 60 chhungin ziakin an remtihlohna hi an thehlut tur a ni. Dodal an awm chuan Collector hian ngun takin a ngaithlain hearing te pawh a nei tur a nih laiin hei hi tih a ni lo a ni a. A copy hmuh tur pawh a la awm lo. Hei vang hian Lengpui mipuite tan pawh hriat ngaihna a awm lo. Preliminary Notification-ah khan section 15 hi sawilan niin ni 60 chhungin tih turah ni 15 chhungin tih a ni a, hei hi a dik lo hulhual tih a sawi bawk.
Lalpianfela Chawngthu chuan ZPM hian Notice to interested person an bawhchhiat nasat thu te, Section 12 in a sawi anga Preliminary survey of land tih a nih loh thute leh he ram laknaah hian interest chhut dan a dik lo nasat thute sawiin, “Thil thleng ngai lo leh pawi em em ta chu, ram tin 105 chuang hmun acquire tur a ni a, chu acquisition atana assessment zawng zawng ti zo vek tur chuan ni 15 chauh Aizawl DC hun pek a ni hi a ni,” a sawi a. He ramah hian Land Scam lian tham tak, dan leh hrai pawisa miah lova kalpui a ni hi Mizoram tana zahthlak an tih thu a sawi a. ZPM sorkar hian ‘Burma Sipai Sorkar’ ang maiin dan an duh duh hunah an pawt kawiah a puh bawk.