Aizawl : Kum 2024 chhunga vawk hri, African Swine Fever (ASF) avanga vawk suat te zangnadawmna (ASF Culling Compensation) chu AH&Vety Minister C Lalsawivunga’n Thawhtanni khan a sem chhuak.
AH&Vety Minister pisa-a ASF avanga vawk suat te zangnadawmna sem chhuahna hunah hian kum 2024 a ASF avanga vawk suat te zangnadawmna atan Centrally Sponsored Scheme (CSS) atangin Rs nuai 779.67 leh State Matching Share (SMS) Rs nuai 779.67, a vaiin Rs nuai 1559.34 hmuh a ni a, hei hian 63.65% phuhrukin beneficiery mi 4,316 hnenah pekchhuah tan a ni, heng sum zawng zawng te hi district tinah dah fel vek a ni tawh bawk.
Aizawl district-a beneficiary thlan bik mi 10 hnenah AH&Vety Minister hian cheque hlanin, Thawhtanni vek khan district headquarters tinah an district huam chhunga beneficiary te hnenah sem ve nghal a ni.
AH&Vety Minister C. Lalsawivunga chuan March ni 21, 2021-a Lungsen, Lunglei district-a ASF hmuhchhuah a nih atanga nimin thleng khan ram economy sawi nghing dawt khawpin ASF avangin kum tin vawk thi leh suat a awm thin thu a sawi a. Sorkar laipui thupek angin vawk suatte chauh hi sorkar laipui bituk zat leh dan dinglai angin zangnadawmna 50% CSS leh SMS hmanga pek theih a nih thu sawiin, kum 2022-23 leh 2023-24 chhung khan zangnadawmna atana sum mamawh 25% (CSS & SMS) chauh an dawn avangin zangnadawmna dawngtute hnenah 25% pek a nih thu a sawi.
Minister chuan ranvulhtute hlohna a nasat avangin kum 2024 khan ASF chu Mizoram sorkarin State Disaster-ah puangin, hemi atan hian suat tel lovin ran thi ralna, ran thi pakhat zelah Rs 4,000, ralna dawngtu pakhat zelah vawk paruk chin huamin Mizoram chhungah ralna sum sem chhuah vek tawh a nih thu a sawi a. Kum 2025 chhunga sum mamawhte chu 2026-27 Action Plan-ah dil mek a nih thu sawiin, 100% hmuh ngei theih nan chak taka bawhzui mek a nih thu a sawi bawk.
African Swine Fever (ASF) avanga ran suatte Compensation Rate chu hetiang hian siam a ni:
Kg 15 hnuai lam : Rs 2,200
Kg 15-40 inkar : Rs 5,800
Kg 40-70 inkar : Rs 8,400
Kg 70-100 inkar : Rs 12,000
Kg 100 chunglam : Rs 15,000