Aizawl : BJP Mizoram Vice President Vanupa Zathang chuan, sorkar inrelbawlna tha, hmathlir mumal tak nena Mizoram hi enkawla an duat a ngai tawh tih a sawi.
Thawhtannia BJP Mizoramin Upper Republic-a an party pisa-ah Karthar Inhlanna leh Political Session hun an hmang a. He huna thusawitu BJP Mizoram Vice President Vanupa Zathang chuan, BJP Mizoramin an tum bulpui ber chu Mizoram Thar siam a nih thu sawiin, BJP member tinte chu theihtawp chhuaha Mizoram Thar an thlen theih tur theihnan mawhphurhna an neih thu a sawi.
Mizoram hi tute pawh hian an hmangaih tur a ni a, hei lo ram dang an neih loh avangin a taka hmangaih hi an bat tih sawiin Vanupa Zathang chuan, “Sorkar inrelbawlna tha, hmathlir mumal tak nena Mizoram hi kan enkawla kan duat hi a ngai tawh a ni,” a ti.
Vanupa Zathang chuan BJP National Headquarters-a an hruaitute hian India ram an hmangaih avangin nupui neih loh hial an huam a, chu chuan rah tha a chhuah tih a sawi a. “India ram chu ram hmasawn ber leh thang chak ber kan lo ni thei ta a, eiruk theihna lakah sorkar hnathawk tam tak kut an phuar a, Direct Benefit Transfer kalpuiin kan sum khawih chet tam tak pawh a neitu tur hnenah a thleng nghal thin avangin, vawiin thleng hian eirukna thubuai nei kan party hruaituteah an awm lo hi a ropui hle a ni,” a ti bawk.
BJP sawiseltute avangin an buai phah tur a ni lo tih sawiin BJP Mizoram Vice President chuan, Congress party-te’n theihtawp chhuahin thu dik tawk lo hmangin bei fi thin mah se, sawiselna tur thar lam pakhat mah an nei tawh lova, a thing an her lum reng a, mipui pawh hian an ring tawh lo tih a sawi.