Aizawl : General Administration Department (GAD) changtu chief minister Lalduhoma chuan Sairang Rel Station chu world class ni tura cheibawl a ni dawn tih sawiin, chumi tur atan chuan Rs. vbc. 97 sanction fel a nih tawh thu a sawi a. Sairang Rel Station-ah bazarpui ni bik deuhte siam tura rawtna awm chu tihpuitlin tum nise a ti bawk.
Thawhtannia Assembly Budget Session-ah memberte zawhna leh zawh belhna te chhangin Lalduhoma chuan, Sairang Rel Station chu an ngen angin world class turin phalsak a ni tawh tih a sawi. Chumi tur atan chuan upgrade a ngaih thu leh Railway Ministry hmalakna in tunah hian Rs. vbc. 97 sanction fel a ni tawh a, tender pawh hawn a nih tawh thu a sawi.
Chief minister chuan world class ni turin a building te, vertical extension, horizontal extension bakah new building leh a chhehvel zawng zawngte tih belh teuh a la ngai tih sawiin, Rs vbc 97 velin hna a thawk thei viau tura an ngaih thu a sawi bawk.
Tun aia Sairang Rel Station hman tangkaina tur kawngah, bazar ni siam a, theih phei chu nise Inrinni hi bazar ni te siam a tha ang em tih chu rawtna siama paha member zawhna siam chhang bawkin chief minister chuan, “Bazarpui ni bik deuhte, bungrua thawnchhuah ni tur te, a lo luh ni turte tinzawnin a mawhphurtu department lamin lo enzui se, tihpuitlin tum nise,” a ti.