Aizawl : MJA Serchhip district-in NHIDCL hnuaia KRAM Infracon Pvt. Ltd. in Serchhip Sailiam leh Keitum inkar kawng siamthat hna leh Serchhip Bypass Road siamthat hna an thawh mek chu Thawhlehni khan an tlawh.
MJA Serchhip District member-te hi an President Kapliana Pachuau hovin member parukin kawngsiam hnathawh mek an enfiah a. KRAM Infracon Pvt. Ltd. atangin Lalhruaitluanga, PRO leh Dibyendu Mukherjji, Site Engineer ten lo dawngsawngin an hnathawh mek dante an hrilhfiah a ni.
KRAM Infracon Pvt. Ltd. hian NHIDCL hnuaiah Baktawng leh Keitum inkar National Highway siamthat hna hi thawkin an hnathawh te hi March 2024 khan an zo tawh a, chumi hnu kum li chhung enkawlzui tur an nih angin leiminin kawng chhuat leh kawngko a tihchhiate siamthat hna hi an thawk a ni.
Serchhip Sailiam leh Keitum inkar kawng thawmthat hnathawh chu an zo tawh a, an hnathawh pawh a tha thawkhat nia an hriat thu MJA Serchhip district chuan an sawi.
Tunah hian Serchhip khawpui helna (Bypass road) kawng siamthat hna thawh mek a ni a, March ni 15, 2026-ah chuan siam zo thei tura an inngaih thu an sawi.
Helai kawng siamtute hian an harsatnate sawiin, MJA Serchhip District chuan KRAM Infracon Company te chu mipuite tana tha thei ang ber leh chak taka hna thawk turin an ngen a, kawng siamtu te tana harsatna siam lo tur leh hmanrua te la mai mai lo turin mipuite ngenin, an hnathawh zawh hun tura an beisei hunah a remchan anga tlawh leh an tum thu an sawi bawk.