Aizawl : Mizoram Cooperative Apex Bank Ltd. Branch 35-na, Falkawn Branch chu Thawhlehni khan an Chairman Lalnunsanga’n a hawng.
Falkawn Branch hawnna hun hi Mizoram Cooperative Apex Bank Ltd. CEO A. Lallungmuana’n kaihruaiin, Apex Bank chuan Falkawn khua chauh ni lo vin, a tlangdunga khaw hrang hrang he’ng – Hualngohmun, Melriat, Kelsih leh Muallungthu leh a dangte tana dawr theih tur Bank ngelnghet leh dawr nuam din an tum thu a sawi a. Apex Bank chu Mizo mipui hriatthiam dan leh nunphung mila kal tlat a nih thu a sawi bawk.
Mizoram chhunga Federation hrang hrang Chairman te chuan Bank hawnna hi an hmanpui a. K. Rothangpuia, Mizofed Chairman chuan Falkawn khua leh a chhehvel te an vanneih thu sawiin, mipuiin thiam taka Bank an hman phawt chuan hmasawnna rualkhai tak a thlen ngei a beisei thu a sawi.
He hunah hian Falkawn VCP H. Zarmawia leh TBC Lalkhumtiri, Deputy General Manager, Apex bank-te’n thu an sawi bawk.