Aizawl : Central YMA chuan Zone Anti-Drug Squad (ZADS) din belhin, Aizawl khawpui chhungah ruihhlo do beihpui an thlak tan.
January ni 23, 2026 zana Central YMA kaihhruaia Dawrpui Multipurpose Hall-ah Aizawl khawpui chhunga Branch YMA 111 te kalkhawmin an rel angin, Aizawl khawpui chhunga Branch hrang hrangte chu Zone 10-ah inthenin, Zone tinah Anti- Drugs Squad (ZADS) din a ni a, puipate inruatin an huamchhunga Branch tin atangin ZADS member tur pathum theuh ruat leh a ni a. Zone tin hian Duty Post siamin February ni 20, 2026 atangin ruihhlo do beihpui hi an thlak tan a ni.
Zone hrang hrang Duty Post te hi February ni 21-23 zan khan Central YMA hruaituten tlawh kualin, bul tan nan Rs.10,000 theuh an hlan a, ZADS hruaitute leh member-te infuihna hun an hmang nghal a. Central YMA hian a tul angin Zone tin te mamawh leh harsatnate a enpui zel dawn a ni.
ZADS te hian an huamchhung theuhva ruihhlo do beihpui thlakna kawngah theihtawp chhuah a beih an tum a, khawtlang mipuite tawiawmna an beisei bawk.
ZADS te hi Central YMA hnuaia Central Anti- Drugs Squad (CADS) te nen inpuibawm tawnin an thawkho dawn a, Central YMA hruaitu ten an vil bawk ang.