Aizawl : Mizo Zirlai Pawl (MZP) chuan Mizoram Public Service Commission (MPSC) chu full Commission-a awm thuai theihna turin member rintlak ruat vat tur leh Secretary pawh dah vat turin sorkar ngenin, an phut tih an sawi bawk.
Thawhlehnia MZP Gen, Hqrs., Executive Committee Meeting chuan MPSC chu Mizoram tana hna pawimawh tak tak thawk tur la tu an nih avang leh Mizo thalaite beiseina venghimtu a nih avangin, thalai hna zawng mekte tan rintlak ni chhunzawm zel tura an duh tih an sawi a. Tunah hian MPSC-ah Chairman leh member pakhat chauh an awm a, a enkawl tu tur Secretary nei loin hun rei tak alo awm tawh bawk a. MPSC hi full Comission-a a awm thuai theihna turin member rintlak ruat vat tur leh Secretary pawh dah vat turin Mizoram sorkar an ngenin, an phut tih an sawi.
Thutkhawmah hian kum tina March Ni 5-ah ‘Zoram Ni’ hman thin chu kuminah pawh hman leh an rel a. Kumin thupui atan ‘I ram leh hnam humhalh la, khawvelin a dem lovang che’ tih an thlang a. MZP Headquarters, Sub Headquarters leh Branch te chu an remchan dan anga hmang turin a ngen nghal bawk.