Indian Super League season thara an inlan hmasak berah inbuatsaih tlai Odisha FC-in thawhlehni zanah kai thar Inter Kashi an mikhual a, goal awm lovin an inhnehtawk.
Kalinga Stadium, Bhubaneswar-ah mi 2,421-in a hmunah an en a, Odisha tan a tir atangin Mizo pathum – forward Isak Vanlalruatfela, midfielder Lalthathanga Khawlhring leh defender Vanlalzuidika Chhakchhuak ten an khel a ni.
Sum harsatna leh hma lam hun chiang lo avanga ISL season tan mai theih a ni lo rei hle a, hetih chhung hian Odisha-in club inrelbawlna an titawp lailawk a, season titawiin February 14 khan khelh tan a ni a, kar khat a la awm tihin Odisha-in inpuahchahna an la kalpui hman lo a ni.
Mahse, a tira an khelh hun tura ruahman sawn hlat a ni a, season tan atanga ni 10 hnuah Inter Kashi mikhualin season chawlh laia social media lama hriat hlawh tak Mizo tlangval Isak-a’n khung mai theihna remchang nei nghal mah se a puitlin zo lo a ni.
Goal hmaah team pahnih an hriam tawk lo ve ve a, Mizo tel lohna Inter Kashi tan Tomba Singh chuan hla deuh tak atangin tha takin a pet a, goalkeeper Amrinder chuan a dansak. Minute 25 an inkhel tihin Lalthathanga ball pek atangin Rahul KP chuan Odisha tan a pet lut teuh viau a, a hnu lawkah Suhair VP chuan Isak-a ball vawrh a tauh lut lo bawk.
Darkar khat an inkhelh hnuah Isak-a’n a sirah khalh lutin angle chep tak atangin hlauhawm theiin a pet a, Inter Kashi defender David Humanes chuan a dan chhuaksak a ni.
An inkhelh chhungin Odisha-in goal-ah tum kua petin lehlamin vawi riat an pet ve thung a, league kal mekah goal luh lohna inkhel hmasa ber a nih rualin Inter Kashi-in vawi hnih an khelh tawhah tlawm nei lo leh chak nei lovin point hnih an hlawh chhuak a ni.