Chhattisgarh-a Kanker district huamchhunga chetla thin Maoist hel pawl hruaitu senior tak pakhat chu thawhlehni zan khan sipaite kutah a inpe tih security force ten an sawi.
Border Security Force (BSF) te chuan an mi man pa hi Mallesh tia hriat lar a nih thu an sawi a, Chhotebethiya camp-ah amah ngei a ni tih an finfiah thu an sawi bakah, a inpek lai hian AK-47 silai a keng niin a sawi ve bawk.
Mallesh tia hriat lar, Abujhmad hi Chhattisgarh khawthlang lam Narayanpur, Bijapur leh Dantewada district a mi leh sa ngah leh che tla nasa tak a ni a, a chet tlatna hmun hi a zauin, sipai lam tan pawh chet rem lo leh hmun khawk rawk tak tak tamna a ni a, security force ten beihpui an thlak pawhin a khirhkhan leh harsa ber lai pawl a ni thin niin an sawi.
Senior district police officer pakhat chuan Mallesh-a nena inhnaih tak, Maoist dangte pawhin inpek an duh thu an sawi niin an tarlang a, an mi man hi luman cheng nuai 8 chuang nei a nih avangin amah zuia inpe an awm leh thuai an rin thu an sawi bawk.
District police officer te chuan Mallesh a inpek thu bak engmah thuchhuah an la siam thei lo tih an sawi a, amah rawn zuia inpe an awm veleh official-a puanzar erawh an la tum thu sawiin, thu zawhfiah ngai tam tak an la awm thu an sawi bawk a ni.