Zaithiam Rosy K Remsangpuii chuan a pasal nena an inneihna chu ropui taka tih leh inneih an tum dan a ni lo tih a sawi.
Youth Icon judge Rosy K Remsangpuii hian amah duhtu mipa tam tak zingah, Durtlang tlangval C Lalrammawia chu pasal atan a thlang chat a. Vawiin, March 10, 2026, chhun dar 1-ah Durtlang Presbyterian Kohhran Biak Inah nupa ni turin Pathian a kohhran hmaah ‘…a nuamah leh a hrehawmah pawh…’ tiin tiam tlat e an ti tawh dawn.
March ni 5 khan BCM Biak In, Bazar veng, Lawngtlaiah man inhlanna hun an hmang a. Man hlan zawh hian a pasal tur, C Lalrammawia nen Tawngtai Tlangah kalin, inhlan tharna an nei nghal bawk.
An inneih tur chungchangah Rosy-i chuan inneihna ropui leh changkang leh lar hi a duh leh tinzawn a ni ber lo tih sawiin, “Kan inneih tur chungchangah hian Pathian hi kan focus hmasa ber leh a laihawl nise ka duh ber. Min suihzawmtu leh vawiin kan thlenna chhan ber hi a sirah kan dah ang tih ka hlau ber. A hmasa berah awm se ka duh. Mi ropui kan ni lo va, ropui taka thiltih leh inneih kan tum lo,” tiin social media-a a account pakhat, Instagram-ah a story.
C Lalrammawia nen an inhual a, an inneih tur thu an tihchian hnuah Rosy-i hian a Instagram-ah heti hian a sawi a, “Kan intawn dan engkim mai chu Pathian hnathawh leh remruat vek a ni tih kan chiang em em a, chu chu kan lawmna a ni. Kan inngaihzawnnaah kan pahnihin tawngtaina nen hun kan hmang dun thin a. Kristian chhungkua din duh em em ve ve kan ni a. Kan intawn tirh atangin Pathian hnathawh mak tak tak, kan tana ropui tak tak a thleng nasa a, sawi tur kan va nghah tak em. Pathian remruat nghak tlat ve ve kan ni a, a hun takah Lalpa’n engkim a rel fel a, hai der sen rual loh nemnghehna tam tak min pe phal a, kan lawm em em a ni. Pathian zara dam taka kan awm chuan kan inneih niah Pathian hnathawh mak tak tak – movie leh thawnthubu-a mi ni hial awma mawi kan chunga thlengte hi Pathian ropuina tur a nih chuan kan la sawi dawn nia.
“Engkimah Pathian chauh ropui ber se tih hi kan pahniha kan duhna leh kan tawngtaina a ni e. Min lawmpuitu te chungah kan lawm a, ka phone-ah hian contact za bi chauh ka neih tawh avangin sawm awm tak tak te number ka nei lo nasa a, khawngaiha vui mai loa mnahni inngai pawha min lo telpui vek turin ka sawm che u,” tiin a tar lang.
Hetih lai hian, Rosy-i hian a tih ngai hauh lo mai chu kumin Valentine’s Day khan a inpho lang ve tlat. Tuna a pasal tur nena an thlalak dunna chu a Instagram account-ah a post a. Mahse, a thlalak pho chhuahah erawh an hmel a hmuh fiah theih loh thung. Chutah chuan, “Lord, i pray for a love story that will give you glory,” tiin caption a ziak a, love leh prayer anga hman tlanglawn emoji a dah tel bawk. Hei hi an pahniha an thlalak a pho chhuahna hmasa ber a nih ngei hmel.