Aizawl: Assembly Speaker Lalbiakzama’n Assembly House chhunga awm dan mawi zawm tur leh a zahawmna tibawrhbang thei zawnga khawsa lo turin member-te ngenin thu awih lova tiluitute chu mic off-sak hial an nih tawh tur thu sawiin member-te a kamkhat.
Thawhlehnia Assembly session-a zawhna leh chhanna hun intan hmain speaker chuan tun hnaiah house proceedings chungchangin a tha lo zawngin sawi a hlawh ta viau mai a. Tlangkam titi leh social media-ah house chhunga member-te conduct-in sawi bawrhban a hlawh ta deuh anga ngaih theih leh speaker pawh house control tha tawk loa sawi a awm dawn dawn ta fo mai chu lungchhiatthlak a tih thu a sawi.
Tun hma zawngin Mizoram Assembly House inrelbawl dan hian fak a hlawh thin tih sawiin, “India ramah chuan tha filawr lak anga sawi kan ni thin. House proceedings hi TV leh social media lama live-a pekchhuah a nih hnu hian vaiho tih dan kan entawn ta emaw tih mai tur hian member ding lai tihbuai hrim hrim duh vanga lo auh buai te, hun pek nasa taka pela thusawi luih te, speaker address lova direct-a member dang han in-address maite leh thil dang mawi lo tak tak hi a thleng ta fo mai a. Hengte hian legislator-te tana zawm tur Handbook for Members-ina member-te awm dan tur section 15-naa a sawite a kalh tlat a ni tih hi kan hriat nawn leh a tha hlein ka hria a, chhiar nawn leh theuh turin ka ngen che u,” a ti.
House member-te hian house chhunga ram rorelnaah dikna chanvo (rights) an neih rualin hei hian mawhphurhna (responsibility) a keng tel tih erawh hriat a pawimawh tih sawiin speaker chuan, “‘Right ka nei e,’ tih vanga mahni mawhphurhna theihnghilh thaka house chhunga sapatal hi a rem loh mai bakah, he house leh mipui zah lohna lian tak a ni,” a ti.
Speaker chuan member-ten thu an sawia hun pek an bawhpelh nasa lutuk thin chu ngaihmawhawm a tih thu a sawi a. Tun chinah chuan warning bell leh an hun tawp (final bell) a rik hnuah member ding laiten an thusawi kal lai laklawh awm thei a nih avangin minute hnih an innghak ang a, chumi hnua a thusawi titawpa a thu mai lo a nih chuan a mic kha off-sak an ni tawh dawn tih a sawi.
Member pakhatin phalna hmua thu a sawi laiin member dangten an tihbuai fo thin pawh a ngaimawh tih a sawi a. Thusawi tura member a kohin thu a sawi laia member dangin thusawi thei lek loa an lo tibuai thin hian house dan a kalh a ni tih hriat nawn a tha hle tih sawiin, “Member thusawi lai tihbuai tum hrim hrim niawm taka a sawi laia lo din sek hi thil tul lo leh tha lo tak a ni,” a ti a. Heng thil hi a thleng leh a nih chuan member thusawi lai tibuai zawnga member rawn tawng chhuaktu mic kha off-sak an ni tawh dawn tih a sawi bawk.
Speaker chuan, “House proceedings live-a telecast a nih tak leh a hnu lama member-te chet dan video-a en theiha a awm tak vanga member-ten hnam dang legislator-te tih dan entawnin mipui hmuha intihlar leh mipui hmin tumna tawngkam tui tam kan tum tak luatah hian house dan kan bawhpelh thin niin sawi a ni ta fo mai a. He issue address tur hian member-ten engtianga hma lak nge tha kan tih? House proceedings live-a broadcast hi kan titawp rih mai dawn em ni ang? Record atana dah that tur chuan video coverage hi chhunzawm thoin, live telecast bik hi tihtawp ni ta mai se a tha kan ti em? Hei hi chu a tul em lo turah ngai ta ila,” tiin, “Kan hunah chuan house zahawmna vawnhima hnuhma mawi tak kan hnutchhiah hi kan zavai a mawhphurhna a ni a, kan house keader duh dan pawh a ni e,” tiin member-te chu tan la thar leh turin a chah a ni.