Crystal Palace lakah 3-1 in tlawm mah se Tottenham Hotspur enkawl lailawktu, Igor Tudor-a chuan Premier League atanga an tlak a rin loh thu a sawi.
Tottenham hi an zawnin vawi nga an tlawmna a ni ta a, league-ah khelh tur pakua chauh a awm tawh a, tlahniam thei dinhmun atangin point khat chauhin an la him a. Premier League-ah vawi 11 an chak lohna a ni a, hei hi an club record thar a ni.
Tudor hi thla hmasaah khan an dinhmun siam tha tura lak luh a ni a; mahse, Premier League bikah Tottenham manager zingah chuan a khelh hmasak pathuma tlawm nghal vek hmasa ber a ni a. Crystal Palace nen an inkhelh zawhah a hna chungchangah zawhna pawh a hmachhawn hnem hle.
A hna atanga bân a hlau em tih zawhna chu Tudor chuan, “Chutiang lam chu ka ngaihtuah lo. Ka hna ka thawk a, chu chu a ni mai. Fan-te rilru chu ka hrethiam a, football-ah chuan thil thleng ve thin a ni a. An beidawng hle a, khel tha turin min duh bawk. Chu chu kan hria a ni,” a ti.
“Keini pawhin tha zawka khelh kan duh. Vanduaithlak takin tunah hian kan chhiat lai ber a ni a, red card khan thil a tidanglam vek a. Thil mak deuh ka hrilh ang che u, kan inkhelh hnuah hian a hma aiin ka rinna a nghet zawk tlat. Thil hmuh ka nei a ni,” a ti.