Aizawl: Horticulture Department hmalakna hnuaia Chapchar Kût denchhena buatsaih Chapchar Kût Flower Show chu Thawhlehni khan Horticulture Minister C Lalsawivunga’n a hawng.
Aijal Club Park-a Chapchar Kût Flower Show neih hawnna inkhawmah khuallian C Lalsawizunga chuan, Flower Show buatsaihtu Horticulture Department-a thawktute, Association hrang hrangte leh an pangpar tharchhuah phochhuaktute chungah lawmthu a sawi a. Mizoram mipui mai nilo, India ram hmun hrang hrang leh khawvel ram dang atanga khualzinte pawhin flower show hi hmu ve se a duh thu sawi.
Horticulture minister chuan mipuite chu khualzin thleng thiam leh dawngsawng thiam an nih a pawimawh thu sawiin, Mizoram hi khualzin hiptu ram mawi leh nuam taka kan siam a ngaih thu a sawi a. Mizorama hnam hrang hrang chenghote chu he flower show-a pangpar chi hrang hrang mawi tak takte anga Mizoram tana par chhuak ve turin a sawm.
Kumin hian chief minister kaihhruaina hnuaia Chapchar Kût Organizing Committee ruahmanna leh Horticulture hmalaknain Chapchar Kut Flower Show 2026 hi March Ni 10-12 chhungin Aijal Club Park-ah hman a ni dawn a. He Flower Show-ah hian pangpar chi hrang hrang leh bonsai-te pholan a ni a. Pangpar zuar duhte tan dawr 72 buatsaih a ni a. UD&PA ngenna zawmin Chapchar Kût Flower Show chhung hian bawlhhlawh tello-a hun nuam tak hman a nih theih nan hman khat daih hmang tlem tura inzirtirna uar taka kalpui a ni bawk.
He Flower Show hi Covid-19 hun lai (2021-2022) tih loh chu kum 2019 atang khan kum tin hman a ni a. Chapchar Kût Flower Show hi Horticulture Department leh Association pali – Mizoram Florists’ Association (MFA), Zo-Anthurium Growers Co-operative Society (ZAGCS), Bonsai Association of Mizoram (BAM) leh Orchid Society of Mizoram (ORSOM) te tangkawpin an buatsaih thin a ni.