Aizawl: Education Minister Dr. Vanlalthlana’n zirtirtu indaih lohna phuhru turin school hrang hrangah hmalak mek a nih thu leh, middle school-ah zirtirtu 500 chuang contract-a lak tum a nih thu house a hrilh.
Thawhlehnia Assembly session-ah Directorate of School Education hnuaia an hmalaknate tar langin, minister chuan primary school-a post ruak hnawh khat turin sorkarah dilna thehluh a nih thu a sawi a. High school-ah Science leh Mathematics casual teacher 20 lak mek an nih bakah zirtirtu nghet 57 lak phalna dawn tawh a nih thute a sawi a. Heng bakah hian higher secondary school-a thawk tur casual lecturer 15 lak mek an nih thute a sawi tel bawk.
Minister Dr Vanlalthlana chuan middle school zirtirtu contract-a lak tum chungchang hi sawi zauvin, a thawh khatnaah 212, a thawh hnihnaah 190 leh a thawh thumnaah 142 lak ruahman a nih thu a sawi a. He ruahmanna hi finance department-a ngaihtuah leh inchiah mek a nih avangin a zat chiah la sawi fak theih ni lo mah se, zirtirtu eng emaw zat chu neih belh theih ngei a beisei thu a sawi bawk.
Dinhmun thaa sikul thenkhat hlan kaina tur buaipui mek
School Education changtu Minister Dr Vanlalthlana chuan school thenkhat dinhmun tha zawka hlan kai chu academic session tharah dan anga kalpui theih tura buaipui mek a nih thu house a hrilh.
Assembly thutkhawm neih mekah nimin khan School Education minister Dr Vanlalthlana chuan, sorkar hmasain school 52 dinhmun tha zawka a hlan kai zinga dan anga tlingte chu Academic Session 2026-2027-ah hian dan anga kalpui theih tura buaipui mek a ni tih sawiin, School Upgradation Notification chu tihchhuah tura buaipui mek a nih thu a sawi.
Lumpsum Grant-in-Aid (GIA) a upgrade-na notification chu February 6, 2026 khan tihchhuah a nih thu leh budget session lo awm turah hian school upgradation-te tan FY 2026-2027 budget-ah pawisa dah a nih loh thu a sawi bawk.
Zawh belhna chhangin education minister chuan school 52 tih thin chu khawi school bik nge an nih hriatthiam a harsat thu sawiin, sorkar hmasain dinhmun tha zawka hlan kai tura a tih hrim hrim chu school 180 zawk a nih thu a sawi a; PM Shri School 35 a awm thu a sawi a ni.