Aizawl: Power & Electricity department changtu F Rodingliana leh Adani Group aiawhten megawatt 460 thar chhuak thei tur Chhimtuipui (Kolodyne) Hydel project khuah dan tur leh Mizorama power sector tihhmasawnna kawnga thawhho theih dan tur an sawi ho.
Minister pisa-ah Thawhtanni tlaia an inkawmnaah hian F Rodingliana chuan, Adani Group aiawha lo kalte chu lawmthu hrilhin, Mizoram sorkarin power intodelh a tumna kawngah thawhpui tur company tha a dap mek laia India rama company lian leh rintlak ber zinga mi Adani Group-in Mizoram lam hawia hmalak duhna an nei chu lawmawm a tih thu a sawi a. Minister hian hydro power sector-ah Mizoram hian theihna sang tak a neih thu sawiin, chung hai chhuak tur chuan puihna a mamawh a, Adani Group-te an rawn lang ta chu phurawm a tih thu a hrilh.
Business Development – Hydro Pump Storage Project, Adani Group Vice President Sumit Verma pawhin, Mizoram sorkar lo dawnsawnnaah lawmthu sawiin, tun hnaiah Adani Group chuan green energy development lamah nasa taka hma a lak thu leh he lama Mizoramin haichhuah tur a neihte haichhuahpui a, thawhhona tha tak an neih chhoh zel a beisei thu a sawi a. Project site-te a hmun ngeia tlawh tura Mizoram tlawh an nih angin a hmun an kalchilh nghal dawn tih a sawi bawk.
An inkawmnaah hian project site pahnih – Chhimtuipui (Kolodyne-II) Hydel Project ruahman mek leh Darzolui Pump Storage Project site-te chu Adani Group-te tlawh tura rel a nih angin, Thawhlehni khan an tlawh nghal a ni.
P&E Minister hi P&E Commissioner K Lalrinzuali leh Department Engineer-te’n an tawiawm a. Adani Group atanga Sumit Verma bakah Arindam Banerjee, Senior Manager, Hydro PSP; Deepak Singh, Sr Engineer, PMAG and Hydro PSP; Sudhakar Rao, Dy Manager, Projects leh Narayanswamy, Manager, Projects & Hydro PSP te an lo kal a ni.