Formula 1 season an tan chiah a, tun season chhungin thil thleng ngai lo tak thleng thei dinhmunah a ding mek a – Bahrain Grand Prix emaw, Saudi Arabian Grand Prix emaw te an thulh mai thei a, an thulh ta a nih pawhin calendar-ah a thlaktu a awm dawn lo.
Middle East-a an boruak tawn mek, US-Israel ten Iran nena inbeihna avanga zin veivahna leh bungraw phurh kualna a buai vek vanga hetiang thu hi awm mek a. He inbeihna hian infiamna khawvel a nghawng tan tawh a, World Endurance Championship pawhin Qatar-a season hawnna tur neih an tum chu an sawn hla tawh a ni.
F1 intlansiak awm tur, Bahrain leh Saudi Arabia chuan ngaihven an hlawh hle a. Hengte hi season tir lama ram hla luhchhuah hnua intlansiak lehna turte an ni a. Ram buai vanga heng intlansiakte hi an thulh a nih pawhin F1 thuneitute chuan a thlakna tur ruahman thar an tum loh thu an sawi.
Season tan hma atangin season tluana an hun hman dan tur an ruahman sa vek tawh a. Hei vang hian Bahrain leh Saudi Arabia intlansiakte chu nei dawn lo mah se a dang zeh telna remchang a awm thei dawn tawh chuang lo a ni.
Hun rei lo te chhunga grand prix thleng thei tur leh intlansiakna hmun zawn chu thil harsa tak a ni a. Kum 2020 hripui len laia F1-in season chhunzawm nan intlansiak thlaktu a siam ang kha a ni tawh lo a, tunah chuan calendar a khat tawh a, intlansiak dang belh leh chu thil hautak deuh a ni tawh ang.
Harsatna dang lian tak chu bungraw phurh leh zin veivahna hi a ni a. F1 team hian khawvel hmun hrang hrangah hmanrua leh bungraw tam tham tak an phur kual reng a. Hunbi felfai tak neia kalpui a nih avangin chawp leh chilha ruahmanna thlak thut chuan harsatna nasa tak a thlen thei a ni.
Middle East intlansiak hi thulh a nih chuan team-te hi Asia-a intlansiak an neih zawh atangin bungraw thawn chhuak turin an inpeih tawh thin a. Chumi ruahmanna zawng zawng thlaka Bahrain leh Saudi Arabia thlaktu tur ruahman leh chu a harsa dawn a ni.
Bahrain emaw, Saudi Arabia emaw te hi thulh a nih chuan calendar her rem aiin season tihtawi zawk mai chu a finthlak ber dawn a ni.