Mizoten kut kan neih hrang hrang zinga kan ngaihhlut leh nuam kan tih ber, kan zavaia huapzo ni bawk chapchar kut kan lo thleng dawn ta.
Tun hma ang diak diakin hmang thei tawh lo mah ila kan hman thin dan zelah hian hmasawn chhoh tum ila, hmun hrang hrangah kan hman leh lawm dan a lo inang lo deuh a nih pawhin inkhairual tlang deuh zawk tura chet pawh a tha hle awm e.
Aizawlah hian a lawmna pui ber neih thin niin, sorkar pawh a insengso viau thin a, mipui pawhin kan hlutin, pungkhawm kan tam thei hle bawk.
Hemi bakah hian district hrang hrang leh khawlian zual deuhah lawmna neih niin, mahni khawbila hmang thlengin kan awm thin.
Heti teh nuai lo deuh hian sorkar hian ruahmanna felfai tak neiin, a hmang thei tur khua/town in-report theih hun hi ruahmanna se la, khaw inthenawm hnaite chu hman ho theih dante ngaihtuahin, a tul angin tanpuina pawh pe mai se la, kan harsatna tam tak hi chu a inphuhru chho thei maiin a rinawm.
Sorkar berin ruahmanna felfai a siam a, dan tha tak a siam chho thei a nihchuan tun aiin chapchar kut pawh hi kan hlut lehzualin a rinawm a, a hmanna pawh a tamin, mitin min nghawng thar leh ngeiin a rinawm bawk a ni.