Aizawl: Mizo Literature and Language Teachers’ Academy chuan Assembly Budget session thutkhawm neih mekah, March 9, 2026-a Education Minister Dr Vanlalthlana official resolution put luh, ‘Eighth Schedule to the Constitution of India-a Mizo tawng hi telh tura hma lak ni rawh se’ tih lungrual taka pass a ni chu lawmawm an tih thu an sawi.
Thuchhuah an siamah he official resolution chungchangah political party hrang hrang aiawha thusawitute pawhin, India constitution eighth schedule-a Mizo tawng telh ve a pawimawhzia hria a, resolution an thlawp vek chuan a hnam anga inlungrualna pawh a tar lang nia an hriat thu an sawi a. India constitution eighth schedule-a Mizo tawng telh ve tura dilna leh ngenna awm mek pawh, he resolution hian chak lehzuala a nawr theih ngei an beisei tlat tih an sawi.
January 23, 2026-a Mizoram Education Reforms Committee (MERC) thukhawmin an rawtna, Mizoram chhung English Medium School zawng zawngah, chawlhkar khatah ni khat tal ‘Mahni Tawng Hman Ni’ (Home Language Day) siam a rawt pawh lawmawm an tih thu leh he rawtna pawh hi sorkarin a takin kalpui ngei se an duh takzet tih an sawi bawk.