March 17, 2026 atangin sorkarin Lammualah kutthlak tan a ni dawn a. A zualpui kutthlak hmasakna atan Rs vbc 153.56 dah a ni a, Lammual ram chu tu tan mah pawh hek an phal dawn lo tih Chief Minister Lalduhoma’n a sawi.
Nilainia Assembly Budget session-ah chief minister chuan home minister hmalaknain chawlhkar thar, Thawhlehni zing atangin Assam Rifle chhuahsan ramah kutthlak tanin thuthlawhpui nen an chek tan tawh dawn tih a sawi.
Chief minister chuan kawngpui tihzauhna tur an thawk nghal dawn tih a sawi a. A chhungah Vana Pa Hall lian tak an sawn dawn a. Hmun dang tel lo hian tuna Lammual an tih huam chhung zaa 60 hi green area-a siam an tum a, zaa 40 erawh hi chu thil tul eng eng emaw lo theih loh awm ve se an ti a. Chumi atan NGO leh political party zawng zawng awmkhawmin an rel angin hma lak a ni dawn tih a sawi.
Hetianga kut an thlak tan thei tur chu lawmawm a tih thu sawiin chief minister chuan, “Kan fel bik vang pawh a ni lo va, a hun hi kan tawng a ni ve maiah kan inngai a ni,” a ti.
Chief minister chuan Lammual huam chhunga a zualpui kutthlak hmasakna atan hian Rs vbc 153.56 an dah phawt tih sawiin, sum dah teuh khan an thawh hman chuan loh avangin an thawh nena inang tur, an mamawh ang zelin pawisa an pek belh mai dawn tih a sawi.
Lammual ram chhung chu mi mal leh pawl ang pawhina dil thiang tawh loh a ni tih sawiin chief minister chuan, “Kohhran leh pawl angte pawhin tu tute emaw hian an dil leh thin a; mahse, advisory committee hnuhnung ber khan eng dilna mah pawm tawh loh tur, eng ang dilna pawh lut mah se agenda-ah chhawp tawh loh nise an ti a. Chuvangin, dil thiang tawh loh a ni a. Tu tan mah pawh hek an phal tawh dawn chuang lo. Hei hi mi mal leh pawl zawng zawngin hria se,” a ti bawk.