Mizo nulaten Women’s Under-23 One Day Trophy Plate final-ah a hmaa an lo hneh loh tawh, Sikkim lakah phuba an la a, Sandhia Rai-i wicket sarih lak nen run 81-a hnehin an champion a, season leh atan a thiam rual inelna, Elite Group an kai.
Cricket Stadium, Sector 16, Chandigarh-a Zirtawpnia final khelhah hian thum vawra chak, Sikkim-in vawm hmasak an thlang a. Mizoramin hma takah wicket hloh nghal mah se group stage-a an inkhelh hmasaka century lo vaw chhuak tawh, Jacinta Laltanpuii chuan run 18 a thawh nen dinhmun chhe lutuk lovah an awm.
Lalhmangaihsangi (Mami) chuan hun pawimawhah captain a ni tih lantirin ball 74 a hmachawnah run 38 a vaw chhuak a. Karie Chakma-i’n run 21 leh a tawp lamah Thelma Laldinthari’n run 19 an thawh bawk a, over 50-ah run 166 tlinin mi pakua an thi.
Sikkim-in nomawi lak tuma Mizo nulate run siam an umnaah Sandhia-i an ngam lo va. Kawnpui nula, Player of the Match-a thlan zui tak hian Sikkimish batter pasarih zet a vawm hlum a, over kua a vawmah run 11 chiah an vuak chhuahsak thei.
Mizo bowler-te lakah hian Sikkimish batter pathum chiah run 10 vaw chhuak tling an awm a, run siam miah lovin pathum an thi bawk a. Over 29-ah run 85 chauh tlinin an thi vek a ni.
Tun inelnaah hian kar hmasa Ningani khan group stage-ah Mizo nulate hi Sikkim lakah run 44-in an lo tlawm tawh a. Hemi tum hian New Chalrang nula, Jacinta-i chuan run 120 a vaw chhuak nghe nghe.
Mizoram opening batter Jacinta-i hian tun inelnaah hian vawi ruk khelhah run 290 a siam a, century leh half century vawi khat ve ve vaw chhuak bawkin Player of the Series atan thlan a ni.
2025-26 season-ah hian Cricket Association of Mizoram (CAM) team hrang hrangten Board of Control for Cricket in India (BCCI) inelna 15 hmachhawnin pasarukah final lutin champion nomawi pathum an la ta a ni.
Mizoram Under-23 Women’s team hian Inrinni khan Aizawl an thleng a, Lengpui Airport-ah CAM buatsaiha anmahni lo lawmna hun hman niin an zavaiin Thangchhuah puan bahtir an ni.
CAM hian hun remchang hmasaah an nomawi lak lawmna hun buatsaih a tum bawk.
Final INKHEL KHAIKHAWMNA
Mizoram – 166/9 (Over 500)
Lalhmangaihsangi – 38 (74)
Karie Chakma – 21 (29)
Sikkim – 85 (Over 29)
Nandika – 28 (53)
Sandhia Rai – 7/11 (Over 9)
Run 81-in Mizoram an chak.
Player of the Match – Sandhia Rai
Player of the Serier – Jacinta Laltanpuii