Hmeichhe band/group ngainat hlawh leh lar tak ni thin Pussycat Dolls chuan official takin an kir thu an rawn tichiang leh ta, global tour an nei chhunzawm dawn bawk.
Original member pathum Nicole Scherzinger, Kimberly Wyatt leh Ashley Roberts te chuan an kum 20 tlinna pualin tha thar an rawn nei leh a, ‘Club Song’ tih lyrics video an siam chu tichhuakin, hei hi music video pangngaiin an siam chhunzawm dawn niin an sawi.
An kum 20 tlinna pual hian global tour an nei chhunzawm dawn niin an sawi a, fans te chu lo inring turin an sawm bawk.
An tum dan chuan North America leh Europe hmun hrang hrang leh a bik takin UK-ah hmun a tam thei anga tour neih an tum thu hi an sawi a, ticket pawh naktuk atanga zawrhchhuah tan an tum niin an sawi a ni.
PCD te hian kum 2019 atang khan inzawmkhawm leh an tum thu hi sawi tawh mahse a tak an chantir thei lo a, February 2020 khan The X Factor UK season finale-ah inlanin, Covid-19 boruak avangin an duh angin thil a kal leh ta lo a, an band hotunu Scherzinger chuan January 2020 khan inzawmkhawm leh an tum thu social media lamah an cancel thu a puang zui a ni.
Hun a kal leh deuh a, tunah chuan an kum 20 tlin lawmna pualin hmachhawp hrang hrang an neihte tihhlawhtlin ngei tumin inbuatsaihna an nei chho leh ta zawk a, tour thlengin an rawn sawi ri ta.