Aizawl: Ministry of Information & Broadcasting, National Film Development Corporation leh Directorate of Information & Public Relations, Mizoram tangkawp buatsaih ‘Lemchan – Mizoram Film Festival 2026’ chu nimin khan Aizawl-a I&PR pisaah tan a ni.
Lianchhiari Runa Mini Theatre-ah I&PR Minister B. Lalchhanzova’n hawngin, a vawi khatna atana Mizoram Film Festival buatsaih a ni chu lawmawm a tih thu a sawi a. Mizoram chuan mi thiam leh creative tak tak a ngah a, he festival hi Mizo film siamtute tana an thiamna pholanna leh Mizo thawnthute khawvel hmaa an pho chhuahna hmun pawimawh tak a nih thu a sawi.
B. Lalchhanzova chuan film siamah ram dangte nen thawhhona tha an neih a duh thu sawiin, he festival hi Mizoramin film lama hma an sawn zelna atan rahbi pawimawh ni se a duh thu a sawi a. Film chu thawnthu sawina hmanrua tha tak, mipuite hlimna petu leh zirtirna tha tak tak pekchhuahna a nih bakah thalaite tan eizawnna siamtu a nih thu a sawi.
Mizoram Film Festival hawnna inkhawmah hian IPRP&S Secretary Bethsy Zothanpari Sailo bakah, festival chhim tura sawm, Bollywood film eng emaw zata chang tawh, Lilette Dubey leh National Film Development Corporation-a Domestic Film Festival Head Gouri Nair te pawhin thu an sawi.
Lemchan – Mizoram Film Festival hi Nilaini thleng awh tur a ni a. Hemi chhung hian film lama mi thiamte hnen atangin zirtirna hrang hrang neih a ni dawn a, state hrang hrang film thlan bikte leh Mizo film-te chhuah a ni dawn bawk.
He festival-ah hian India state hrang hrang atangin film siam lama mi thiam eng emaw zat sawm an ni.