Aizawl: MNF chuan nimin khan Vana Pa Hall kawtah ‘Thu dik sawi tur leh dawt hmanga Mizoram min hruai tawh lo turin Pu Lalduhoma CM phutna’ punkhawm an huaihawt.
He hunah hian MNF Treasurer Lalruatkima chuan thu sawiin, Mizoram politics-a la thleng ngailo, chief minister dawtsawi hrat lutuk vanga punkhawm a ngai chu vanduaithlak a tih thu sawiin, “Kan leiba leh kan budget dinhmun thlirin a lungawithlak loh hle a ni. Kan ramah sum lengvak a tlem a, dawt erawh a leng nasa hle,” a ti.
UNNATI chungchangah hian CM hi dawt sawiah a puh loh theih loh tih sawiin Lalruatkima chuan, “A dawtsawi level a hniam hle. UNNATI leh SBI a hriatpawlh tlat mai hi a mak a. Lengpui ram hralh sum kawng bo nen a hriatpawlh em ni?” a ti.
MNF treasurer chuan election an hmachhawn tawhah rorel lai an che chhe ta zel a. AMC election chungchangah a chhan sawi tur awm si lovin inthlan an puang thei lo va, an candidate tur pawh an la puang thei lo va, inthlan an cholo tih a lang chiang hle. Aizawl khawpui sawn a, Aizawl chhungah hmasawnna engmah thlen tum tawh lovin hma an la a. MNF erawh chuan AMC hmang leh a theih ang angin Aizawl hi chei hnum deuh deuh an la tum zel tih a sawi.
MNYF Hqrs Vice President Lalnunmawia Pautu chuan thu dik nge dawt a ni tih hriat loh, mi dangte diriam thin, Assembly House chhung leh pawnah dawt tam tak sawi thin CM kan hrawn mek thu a sawi a. Kum 2024 July thla khan CM leh a naute dawtsawi 100 an lo hal tawh thu leh CM dawtsawi thar lam tam tak an hal leh tur thu a sawi a. “CM-in UNNATI loan Rs. vbc 15 la anga a insawi chu dawt a ni a, Rs. vbc 5 chauh a la tih MNYF-in bank-ah kan zawt fiah a, dawt lian tak a sawi a ni,” a ti.
He punkhawm hi MNF Gen Hqrs General Secretary Er Lalrinawma, ex-Minister in a kaihruai a. Zothansangi Hmar, Advocate, MNF Legal Board Member pawhin thu a sawi bawk.