Cambodia sorkar chuan ramdangmi kum 50 chung lamte chu tualchhung hmeichhiate nena inneih an remti tawh dawn lo tih a sawi chiang a, Dan thar an siamah chuan ramdangmi kum 50 hnuai lam an nih a, thlakhatah dollar 2,500 aia tam an hlawh anih loh chuan Cambodian hmeichhiate chu nupui atan an nei thei lovang tih a ni.
Sorkar thupuangtu chuan he dan thar hi mahni nupui te chawm zo a, tha taka enkawl thei an awm nana siam a ni a ti a.
“Chutih rualin, cambodian hmeichhia te hi ramdangmi upa tak takte nena an inneih kan remtih loh vang a ni pakhat. Nupa an nih chuan inhmeh tawk tak ni se, kum inthlau lutuk ang chi, pafa an sawi ang dinhmun kha chu kan hmu duh lo a ni,” a ti.
Hei hian chhan dang a nei tho bawk a, mihring inhralhruk (human trafficking) a thlen loh nana hmalakna chikhat a ni a, hetih lai hian, he dan an hman tan mek hian, ‘human trafficking’ hi engtiang chiahin nge a dan theih ang, tih erawh hriatchian a la harsa hle thung.
Tuna a lan danah chuan, thlatin tih mai tur hian Cambodia-ah ramdangmi leh tualchhung mite inneihna hi vawi 50-70 te a thleng ziah anga chhut a ni. Ramdang mi mipa te laka sorkar thikthu a chhiat viau lai hian, ramdangmi hmeichhia te erawh chuan zalen takin Cambodian mipate hi an nei thei tih a ni thung.