Brazil footballer hlu zual an thlang chhuak a, tun laia sawi hlawh em em, Vinicius Jr chu pathumnaah chauh an dah.
Real Madrid player tha, kum 16 mi chauh a nih laia Spanish club lianin £ maktaduai 38-a an lei Brazil team-ah chuan a langsar ber pawl a ni a. Tuna kum 25 mi ni tawh, Vinicius hian Real Madrid-ah Champions League nomawi pahnih a la tawh a, 2024 Ballon d’Or-ah khan Rodri hnuaiah awmin pahnihna a ni bawk.
CIES Football-in an chhut dan chuan tunlaia Brazil footballer zingah pathumnaah a tla thla tlat a. Chelsea star naupang pahnihin Vinicius hi an lehthal a ni.
Estevao Willian chu hmahruaitu a ni a, a hlutna chu £ maktaduai 102 niin Chelsea-in an leina aiin a let thum velin a sang zawk tawh.
Nikum nipui lai khan Brazil atangin England a pan a, he winger kum 18 mi hian English football a zawm tirh hian a khel thiam ang em tih zawhna a lian hle a; mahse, a insiam rem tha nghal hle a, Premier League-ah goal hnih, Champions League-ah goal thum leh cup dangah goal khat ve ve a khung tawh a ni.
Brazil footballer hlutna nei sang pahnihna chu Chelsea player tho niin, London club-in nikum nipui laia Brighton atanga £ maktaduai 60 senga an lak luh, Joao Pedro niin, tunah chuan a hlutna chu £ maktaduai 98 a ni tawh.
Chelsea hian kum liam ta chhung khan centre forward tha an zawng thin a, kum 24 mi, Joao Pedro hi a chhanna chu a tih theih a, tun season Premier League vawi 29 a khelh tawhah goal 14 a khung tawh a. A hlutna hi £ maktaduai 78-a hlu Vinicius aiin a sang ta zawk a ni.
Palina, pangana leh paruknaah naupang langsar rual dang an awm a, Real Madrid-in beiseina sang tak an neihna, Endrick chu Vinicius dawt chiahah a awm a. Kum 19 mi hian Lyon-ah loan-in a khel mek a; mahse, £ maktaduai 69-a hlu hi Brazililan footballer zingah chuan a beiseiawm ber pawl a ni.
Kum 21 mi, Savinho chu panganaah a awm a, £ maktaduai 67-a hlu a ni a. Tun season-a Manchester City tana a goal hnih khungte chu Carabao Cup-a a khungte an ni.
Vitor Roque chu parukna a ni a, he forward kum 21 mi hian Spain-ah vawi 49 inkhelhah goal kua a khung tawh a, nikum khan Palmeiras a zawm a ni.
Pasarihnaah chuan Arsenal player Gabriel Martinelli awmin a hlutna chu £ maktaduai 60 a ni a. 10-naah hian Arsenal defender Gabriel Magalhaes a awm a, a hlutna chu £ maktaduai 47 a ni.
An pahnih inkarah hian Chelsea midfielder naupang, Andrey Santos leh Barcelona star Raphinha te an awm bawk a ni.
Real Madrid star Rodrygo, Newcastle player Bruno Guimaraes leh Manchester United player Matheus Cunha te chu he list-ah hian an awm ve lo a ni.