Aizawl: Health Minister Lalrinpuii chuan Mizoramah aids vei a tlakhniam theih nan innei tur reng reng HIV/AIDS test certificate thleng phut thin a duh thu a sawi.
Thawhlehni khan Mizoram State Aids Control Society (MSACS) office thar tur, State Resource Centre for HIV/AIDS building thar chu MINECO-ah Health Minister Lalrinpuii’n a hawng a. MSACS in HIV/AIDS donna kawngah theihtawpin hma an la tih a sawi a, he hunah hian Kohhran hruaitute chu nasa lehzuala hmalak pui turin a ngen a. Building hlanna hun hmangtu, Council of Churches in Mizoram General Secretary Rev Dr. Lalhmangaiha hnenah Kohhran hruaitute nasa lehzuala hmalak pui turin a ngen a, an committee agenda-ah AIDS vei an tlakhniam theihna tur lam hawi te telh turin a ngen bawk.
Lalrinpuii chuan, “Kum 30 chhung awareness kalpui a nih tawh naah hma chi hrang hrang a lak ni tawh mah se, HIV kai an tam zel a, kan la hniam thei bawk si lo chu a manganthlak,” a ti a. Kohhran hruaitute chu Mizoramah chuan ngaihsan ber an nih angin kohhran hrang hrang hotute chu hma lak pui turin a sawm a, AIDS vei a tlakhniam theih nan innei tur reng rengah HIV AIDS test certificate thlenga phut thin a duh thu a sawi.
Inkhawm kaihruaitu H&FW Dept. Commissioner & Secretary K. Lalrinzuali sawi danin, MSACS in chak zawka hma an lak theih nan anmahni pual bik building ‘State Resource Centre for HIV/AIDS’ hmun, MINECO ram chhunga mi 445.23 Sq. metre a zau, MINECO Management Committee-in July 29, 2020-a a pek a ni a. A building hi DoNER fund atangin Rs. 4,00,00,000 a sak a ni.
Building hawnna programme-ah hian MSACS Project Director Dr. Jane R. Ralte chuan H&FW Minister Lalrinpuii hnenah ‘Women Icon Award’ a dawn avanga lawmpuina thilpek a pe a, Minister hian MSACS Project Director lo ni tawh thin te hnenah chawimawina thilpek a hlan bawk.