Aizawl: UD&PA Minister K Sapdanga’n khaw 12-a hman tur bawlhlawh paih motor a vai liam.
MINECO Open Gym-a minister-in bawlhlawh paih motor 12 a vai liamte hi Swachh Bharat Kosh Trust hnuaiah Rs. vbc 1.68 dawn a ni a, hemi hmang hian bawlhhlawh phur lirthei 12 lei niin – Farkawn, Kawrthah, Ngopa, Phullen, W. Phaileng, Saitual, Mamit, Khawzawl, Hnahthial, Lengpui, N.Vanlaiphai leh SSO Office, Aizawl te pek an ni a, registration tihfel sa niin document hlan nghal an ni a, truck-ah hian PA set (aurinna) leh GPS Tracker dah vek a ni.
Heng bakah hian heng khaw 12-a sanitation worker-te hman turin Rain Coat – 2, Gloves (kutkawr) – pair 14, Mask – 12, Gumboot – pair 4, hunter boot – pair 2, kekawr – 6, Cap (lukhum) – 2, T-shirt – 4 leh kawrlum – 2 theuh pek an ni bawk.
Hemi puala inkhawmah K. Sapdanga chuan Swachh Bharat Kosh Trust hnuaia sum hmuhte chu faina leh thianghlimna kawnga hmasawnna atan te, bawlhhlawh sawngbawlna hmun mumal leh tha zawk siam nan te, vantlang inthiarna sak nan te, Awareness Campaign bakah faina lama hnathawktute thiamna tih punna tura training leh workshop neih nan te hman thin a nih thu a sawi.
Swachh Bharat Kosh Trust hian Swachh Bharat Mission hmalakna hi sorkar tihhlawhtlin tur bik a ni mai lo tih sawiin K Sapdanga chuan, mi tin mawhphurhna a nih zawk zia a sawi a. Faina leh thianghlimna kawnga thawk chhuak kher lo tan pawh a sum fai ang zawnga an chet chhuah ve theihna niin, heng thawhhona avang hian India pawhin faina leh thianghlimna piah lamah, bawlhhlawh sawngbawlna thlengin hma a sawn nasa hle tih a sawi bawk.