Aizawl: Mizoram hmun hrang hrangah nimin khan World Consumer Rights Day hman a ni a, a hmanna pui ber, Aizawlah chuan Supply Minister B. Lalchhanzova’n a hmanpui.
Dawrpui Multipurpose Centre-a hun hmanah Minister B Lalchhanzova chuan mipuite hian bungrua, ei leh in leh service hrang hrang an leina kawngah dikna chanvo an neih thu leh an chanvo an hriatchian a pawimawh thu a sawi a. Dawrkai, sumdawng mite, pawl leh sorkar department hrang hrangte chu mipuite tana dawr nuam leh rintlak an nih a pawimawh thu sawiin, mipuite pawhin thil an lei dawnin an thil lei tum an belhchian a pawimawh thu a sawi.
B Lalchhanzova chuan mi tin hian rinawm takin an hna theuh an thawh a, mi rintlak an nih chuan Mizoram nuam leh changkang an siam dawn tih a sawi a. Kumin kal meka buhfai lei nan vaibelchhia 220 dah atang khan vaibelchhia 138 vel sorkarah an thehlet tih sawiin, “Hei hi bukna dik hmang tura hma an lak avang te, buhfai bo thlau tur an ven avang te leh subsidy ennawn a nih avang te-a sorkar sum hum thei kan ni,” a ti.
Thawhlehni khan Land Revenue Department chuan hna thawh that avangin Ministry of Rural Development hnuaia Department of Land Resources atangin SASCI Part VII-A hnuaiah lawmman Rs vbc 29 an dawng tih a sawi bawk.
Inkhawm hi Teresy Vanlalhruaii, Secretary, FCS&CA chuan a kaihruai a ni.
Consumers International bultumin kum 1983 atang khan kum tin thupui bik neiin World Consumer Rights Day hman thin a ni a; kumina thupui chu ‘Safe Products, Confident Consumers’ tih a ni.
Aizawl bakah hian district hrang hrangah hun hman a ni.