Aizawl: Joint Civil Society of Mizoram (JCM)0in NHIDCL-te kawng siam endiktu tur, 3rd Party Monitoring Team din turin sorkar an ngen.
Nikum lamah kawng chhiat avanga harsatna nasa tak thlenna hmun, Sairang leh Kawnpui inkar kawng siam mek chu nimin khan JCM chuan an tlawh a, Kolasib JAC hruaitute nen Kawnpui-ah thukhawm nghalin, Mizoram kawng chungchang an sawiho.
Hemi hnua JCM thuchhuah chuan Sairang leh Kawnpui kawng, Buchali leh Sairang inkar bikah fur ruahtui tlak hma a siam ngei ngai a la awm nual a. Tun thlengin ruahtui tlak hleka dil ang mai a tui tling a la awm a, Sairang atanga Sihhmui peng pawh motor lian kal hleihtheih loh leh truck tang khawpa a chhiat avangin rang takin NHIDCL-in an siam nghal an phut a tih an sawi.
Mizorama National Highway tam berte chu NHIDCL hnuaiah a awm avangin an hnathawh that leh that loh endiktu tur Monitoring team an awm lo va, anmahni an in-monitor mai chu tha an ti lo a; chuvangin, Mizoram sorkar chu an thenawm sorkarin an tih angin 3rd Party Monitoring Team din turin an ngen a, sorkarin a ti lo a nih chuan district hrang hranga mi thahnemngaite leh thalaite intelkhawma Monitoring Team indin mai a tula an hriat thu an sawi.
JCM chuan Mizoram dung leh vangah kawngpui chhia avangin nikum lamah harsatna tam tak a thleng a. Tunah hian Mamit kawng te, Tuidam kawng te, Lungleng kawng te leh khaw dang tam tak kawngte fur ruahtui tlak leh hma ngeia siam ngei turin Mizoram sorkar an ngen a. National Highway 06/306, Vairengte atanga Sairang pawh hmun tam takah fur ruahtui thla khat pawh tuar zo lo tur a awmin an hria a; chuvangin, sorkarin hnathawh theihna hun tlem an la neih laia kawngpui pawimawh hrang hrangte thapui thawha siam turin an ngen.