Arsenal player hlui, Thomas Partey chu hmeichhe pakhat lakah pawngsual thubuai pahnih siamsak a ni leh ta.
Thubuai thar hi kum 32 mi, Partey-a’n hmeichhe pahnih laka pawngsual thubuai panga leh hmeichhe dang pakhat laka mipat hmeichhiatna lama thubuai chungchanga a insawi fihlim hnua rawn chhuah belh leh a ni.
Partey hian hmeichhe pali lakah mipat hmeichhiatna lama chet sualna thubuai a hmachhawn tawh tihna a ni.
Thubuai thar pahnihte hi kum 2020-a thil thleng, nikum August thlaa police hnena report lut kha a ni a. Partey hi thubuai thar pahnih chungchangah hian March 13 khan Westminster Magistrates’ Court-ah a vawi khat nan a inlan a ni.
Ghana international player hi September thlaah khan Southwark Crown Court-ah thubuai hmasa pangaah thiam loh a inchantir loh hnuah bail-a chhuah a lo ni tawh a ni.
Nikuma thubuai an lo siamsak tawhte kha chu, kum 2021 leh 2022 inkara Arsenal-a a khelh laia thil thleng a ni thung a. June thla tawpa Arsenal nena an contract a tawpa club a chhuahsan atanga ni li hnuah he thubuai hi siamsak a ni.
He thubuai hi February, 2022-a pawngsual report hmasa ber police-in an dawn hnuah detective-ten a chhui hna an thawh zui a ni a. Kumin November 2-ah High Court judge hmaah inlan tura ruahman a ni.
Premier League a chhuahsan hnuah Partey hi Spainish club Villarreal-ah a khel a. Nikum nipuiah khan kum khat khel turin a zawm a, pawngsual thubuai siamsak a nih hnuah he contract hi ziah fel a ni.
October, 2020 khan Partey hi Atletico Madrid atangin £ maktaduai 45.3-in Arsenal chuan an lei a, Mikel Arteta hnuaiah Premier League vawi 130 a khel hman a ni.
A ukil Jenny Wiltshire chuan Partey hian a laka thubuai zawng zawngte hi a phat vek thu leh an puhna laka insawi fihlimna hun tha a hmu tur hi a lawm hle a ni a ti.
Court chuan a chungthu hi an ngaihtuah ang a, thutlukna an siam vat tura ngaih a ni.